Eachdraidh baile Shiadair ga foillseachadh

Tha leabhar ùr a' comharrachadh 200 bhliadhna de bhaile Shiadair san Rubha.

Tha an leabhar làn sgeulachdan mu na teaghlaichean agus na daoine a tha air a bhith a' fuireach san sgìre thar an 200 bliadhna a dh'fhalbh – bho 1825 chun an là an-diugh.

Chaidh tòrr rannsachaidh a dhèanamh gus an leabhar sònraichte seo a chruthachadh agus, a bharrachd air eachdraidh chudromach agus sgeulachdan, tha nas motha na 200 dealbh na lùib cuideachd.

Chaidh an leabhar a thoirt gu buil le taic bho Chomataidh Baile Shiadair agus e air a sgrìobhadh le Christine NicSuain, a tha a' fuireach ann an Siadar fhèin.

Sgrìobh Christine NicSuain an leabhar às dèidh dhi obair rannsachaidh a dhèanamh air teaghlach an duine aice, Iain

"Tha na bailtean ag atharrachadh cho mòr agus tha sinn air call tòrr dhen fhiosrachadh mu dheidhinn a' bhaile mar-thà leis na ginealaichean a chaidh romhainn," thuirt Iain MacSuain, an duine aig Christine.

"Tha mi a' creidsinn gur e seo an cothrom as fheàrr a-nise an eachdraidh sin a chur sìos ann an leabhar, air pàipear. Gum bi fiosrachadh aig an fheadhainn a tha a' tighinn às ar dèidh mu dheidhinn cò às an tàinig iad agus dè an eachdraidh a th' air na croitean anns a' bhaile."

Thèid an leabhar fhoillseachadh aig tachartas feasgar Disathairne aig Ionad Coimhearsnachd na h-Àirde san Rubha eadar 2f is 4f.