Dragh mu Bhile nan Cànanan Albannach
An t-Ollamh Conchúr Ó Giollagáin
- Air fhoillseachadh
Bidh a' chiad sgrùdadh aig Holyrood Diciadain air Bile nan Cànanan Albannach.
Nochd eòlaiche cànain dragh ge-tà nach dèan a' Bhile feum anns na coimhearsnachdan Gàidhlig.
Tha Ollamh na Gàidhlig aig UHI, Conchúr Ó Giollagáin, am measg na bheir fianais do Chomataidh an Fhoghlaim aig Pàrlamaid na h-Alba.
'S e a sgrìobh 'The Gaelic Crisis in the Vernacular Community' agus thuirt e na fhreagairt dhan cho-chomhairleachadh air an reachdas nach eil e a' dèiligeadh ri duilgheadasan sònraichte ann an coimhearsnachdan dùthchasach na Gàidhlig agus gum bu chòir dàil a chur air.
Obair rannsachaidh a rinn An t-Ollamh Ó Giollagáin
A' bruidhinn air Aithris na Maidne Diciadain thuirt e gur e seo an cothrom mu dheireadh taic a chumail ri coimhearsnachd a th' ann an staing an-dràsta.
"Chan eil mi a' faicinn gur e leasachaidhean susbainteach sa Bhile mar a tha i.
"Chan eil i a' toirt feart dhan phrìomhachas a th' ann an-dràsta agus 's e sin staing na Gàidhlig.
"Tha i ro choltach ri Achd na Gàidhlig 2005. Tha tòrr atharrachaidhean a thaobh biùrocrasaidh na Gàidhlig ach chan eil taicean sònraichte airson nan coimhearsnachdan," thuirt e.
Am beachd an Ollaimh Ó Giollagáin 's e a tha a dhìth iomairtean agus leasachaidhean practaigeach a chumas taic ris an luchd-bruidhinn àbhaisteach.
Bile nan Cànanan Albannach "na dhreach eile air an rud a th' ann an-dràsta"
Chuir e às leth nam buidhnean leasachaidh Gàidhlig nach eil iad ag aithneachadh gu bheil èiginn ann.
"Chan eil iad a' bruidhinn a-mach ann an dòigh a tha soilleir gu leòr, a' cantainn gu bheil staing ann," thuirt e.
Tha e a' moladh gur e an t-slighe a bu ghlice a ghabhail stad a chur air a' Bhile agus beachdachadh às ùr air na ghabhas dèanamh airson a' Ghàidhlig a thoirt air adhart.
"Tha dòighean ann ionmhas a thoirt gu dìreach dha na coimhearsnachdan sna h-eileanan agus gum bi dòighean obrach agus riaghlaidh aca fhèin airson a bhith a' cur nan iomairtean aca fhèin air dòigh.
"Chan fhaigh sinn a-mach às a' Bhile seo ach biùrocrasaidh a bharrachd ach chan e sin a tha a dhìth air coimhearsnachd Gàidhlig ach ro-innleachd agus iomairtean agus ionmhas."