Buaidh tharaifean ùra Aimeireagaidh air gnothachasan eileanach

Sguir Rhoda Meek stuth a chur do na Stàitean Aonaichte gus am bi buaidh nan riaghailtean in-mhalairt ùra nas soilleire

Tha gnothachasan beaga air a' Ghàidhealtachd am measg na tha a' togail dragh mun bhuaidh a bhios aig taraifean ùra aig na Stàitean Aonaichte orra.

Bhon diugh bidh cosgaisean cuspainn air a h-uile seòrsa bathair à Breatainn do na Stàitean Aonaichte, an dèidh mar a chuireadh às don riaghailt fo bha cuid de stuth saor bho chìsean.

B' abhaist nach robh cosgaisean in-mhalairt a' dol air nithean san robh luach nas lugha na $800 ach cha bhi am faochadh 'de minimimis' ann tuilleadh an dèidh don Cheann-Suidhe Trump ainm a chur ri òrdugh riaghaltais.

Tha seo a' toirt buaidh gu sònraichte air companaidhean beaga an Alba a tha a' cur stuth do dhaoine ann an Ameireaga.

"Air sgàth 's nach eil fios againn dè tha a' tachairt tha sinn air stad a chur air a bhith a' reic do na Stàitean Aonaichte buileach glan an-dràsta," mhìnich Rhoda Meek, a stèidhich a' chompanaidh Scottish Island Gifts.

Tha an Taigh Geal ag ràdh gu bheil daoine air a bhith a' dèanamh mì-fheum de na riaghailteam in-mhalairt a bh' ann.

Thuirt iad: "Tha iad air a bhith a' cur stuth mar fentanyl mì-laghail agus drugaichean opiod fuadain do na Stàitean Aonaichte agus a' crochadh air riaghailtean tèarainteachd nach robh cho teann air bathar de minimus, agus a' marbhadh Aimeaireaganach."

Tha riaghaltas Dhòmhnaill Trump ag ràdh gun robh eucoirich a' gabhail brath air an t-siostam a bh' ann

Thuirt Rhoda Meek gun robh iad dìreach air tòiseachadh air luchd-ceannaich ùra a tharraing agus tuilleadh òrdughan fhaighinn às na Stàitean Aonaichte.

Tha i ag ràdh gun dèan iad ath-sgrùdadh aon uair agus bheil e nas soilleire dè na cosgaisean ùra a dh'fhaodadh a bhith air an luchd-ceannaich aca.

Thuirt i: "Tha sinn air àireamhan a chluinntinn bho £60 gu £80 airson parsail.

"Ma 's e sin a th' ann, cha bhi duine airson sin a phàigheadh."

Tha i ag ràdh gu bheil a' mhòr-chuid de na companaidhean Aimeireaganach a tha a' ceannach stuth bhuapa air innse dhi gur e "tàmailt uabhasach a th' ann agus gu bheil iad fìor dhuilich mu na tha a' tachairt agus an dòchas gum bi cùisean air an cur ceart".

Thuirt Rhoda: "Tha sinn uile an dòchas gur e sin a thachras."