Ceist mu na cunntasan aig Colaisde a' Chaisteil

Thog luchd-sgrùdaidh teagamh mu na cunntasan aig Colaisde a' Chaisteil ann an Leòdhas is iad ag ràdh nach do lean iad ìrean cunntasachd co-cheangailte ris an earrann aca ann an Cnoc Soilleir Earr.

Chaidh Colaisde a' Chaisteil ann an co-bhanntachd còmhla ris a' bhuidhinn ealain Ghàidhlig Ceòlas Uibhist ann an 2019 airson Cnoc Soilleir Earr (CSE) a stèidheachadh - iomairt charthannais a bhios a' brosnachadh na Gàidhlig agus dualchas, ceòl is cultar a' chànain.

Mhol luchd-sgrùdaidh dhan cholaiste gum bu chòir dhaibh earrann £4.7m de luach CSE a chur anns na cunntasan airson 2022/23.

Cha do dh'aontaich manaidsearan na colaiste ri sin agus b' e earrann luach £1 a chaidh dha na cunntasan.

A-nis, tha Buidheann Sgrùdaidh na h-Alba air co-dhùnadh gun do chuir Colaisde a' Chaisteil am fiosrachadh ceàrr a-steach mu earrann CSE agus tha iad air teagamh a thogail mu chunntasan 2022/23.

Chaidh Colaisde a' Chaisteil còmhla ri dà cholaiste eile bhon Ghàidhealtachd ann an 2023 agus stèidhichear UHI a Tuath, an Iar agus Innse Gall.

Thuirt Àrd-neach Sgrùdaidh na h-Alba, Stephen Boyle:

"Tha e cudromach gun cùm colaistean ri ìrean cunntasachd gus an toir iad cunntasan ionmhasail cearta seachad agus airson an cuideachadh le bhith a' coilionadh dleastanasan laghail."

Thuirt e gun tèid tuilleadh còmhraidh a dhèanamh le manaidsearan na colaiste a thaobh mar bu chòir dèiligeadh ri earrann CSE ann an cunntasan.

Thuirt an UHI gur e sgaradh bheachd mu luach earrann na colaiste ann an CSE a th' air cùlaibh seo.

Thuirt neach-labhairt: "Tha sinn a' cumail oirnn ag argamaid gu bheil bunait aithisg Earrann 22 mu chunntasan 2022-23 seann Cholaisde a' Chaisteil a' buntainn a-mhàin ri sgaradh bheachd eadar a' cholaiste agus an neach-sgrùdaidh air measadh cùramach na colaiste air luach na maoine."