Adran 2: Casnewydd 1-0 Caerwysg

Roedd gôl hwyr gan Jamile Matt yn ddigon i sicrhau buddugoliaeth gyntaf i Gasnewydd ers mis Tachwedd.

Daeth y gôl gyda 19 munud yn weddill, gan roi hwb i dîm Mike Flynn cyn iddyn nhw herio Middlesbrough yng Nghwpan yr FA wythnos nesaf.

Rhoddodd croesiad Mark O'Brien gyfle hawdd i Matt orffen y symudiad o ganol y cwrt cosbi.

Fe ddaeth Caerwysg yn agos wrth iddynt daro'r trawst, ond llwyddodd yr Alltudion i ddal 'mlaen i selio'r triphwynt.

Mae Casnewydd yn parhau yn y 13eg safle yn Adran 2.