Pwysau ariannol yn gorfodi clwb cerddoriaeth fyw i gau

Roedd Central Station wedi ailagor ym mis Rhagfyr dan yr enw newydd, The Live Rooms

Bydd clwb sydd wedi cynnal nosweithiau cerddoriaeth fyw yn Wrecsam ers 20 mlynedd yn cau ei ddrysau am y tro olaf nos Sadwrn oherwydd "pwysau ariannol".

Caeodd clwb Central Station fis Medi diwethaf, ond ail-agorodd ym mis Rhagfyr o dan enw newydd - The Live Rooms.

Ond cadarnhaodd y clwb ar ei dudalen Facebook mai nos Sadwrn fydd ei noson olaf, ac y bydd yn cau "gyda chalon drom".

"Fel nifer o leoliadau cerddoriaeth eraill ar draws Cymru, yn y blynyddoedd diwethaf mae'r pwysau ariannol sydd ynghlwm â rhedeg safle cerddoriaeth newydd, heb gefnogaeth allanol, yn anodd a heriol iawn, ac yn anffodus fedrwn ni ddim ei gynnal bellach," meddai'r datganiad.

"Os ydych chi eisiau dod i ddweud ffarwel wrth y lle, y penwythnos yma fydd y cyfle olaf.

"Mae hi wedi bod yn bleser llwyr a lot o hwyl i gynnal sioeau yma - gobeithio eich bod chithau wedi eu mwynhau hefyd."

Mae nifer o enwau mawr y sîn gerddoriaeth wedi perfformio yno dros y blynyddoedd, yn cynnwys Robert Plant a Kasabian ac mae artistiaid Cymreig hefyd wedi ymddangos yno, gyda Catfish & The Bottlemen a Gruff Rhys yn eu plith.

Dyma'r ergyd ddiweddaraf i'r diwydiant cerddoriaeth yng Nghymru, yn dilyn cau clybiau'r Parrot yng Nghaerfyrddin, a Gwdihŵ yng Nghaerdydd ers dechrau'r flwyddyn.