'Teimlad o ryddhad mawr' i'r diwydiant twristiaeth

Mae gan bobl hawl i archebu llety yng Nghymru ar ôl 14 Gorffennaf

Yn ôl un o benaethiaid y sector twristiaeth roedd yna yna "deimlad o ryddhad mawr" o fewn y diwydiant yng Nghymru i'r awgrym y gallai'r rhai busnesau ailagor ym mis Gorffennaf.

Dywedodd Andrew Campbell o Gynghrair Twristiaeth Cymru y bydd yn rhaid i'r sector gymryd pob mantais i wneud arian wrth i'r rheolau yma gael eu llacio.

Ddydd Gwener fe wnaeth Mark Drakeford ddweud y dylai busnesau yn y sector fynd ati i baratoi ar gyfer ailagor.

Dywedodd Mr Campbell fod 97% o fusnesau twristiaeth wedi cau o ganlyniad i'r pandemig, gyda 80% o staff ar gynlluniau furlough.

"Mae pobl yn dioddef," meddai.

• CANLLAW: Rhif R: Beth ydy o a pham ei fod yn bwysig

• AMSERLEN: Llinell amser coronafeirws yng Nghymru

• Y GIG: Sâl? Mae'r GIG 'dal ar agor' er gwaethaf y pandemig

• IECHYD MEDDWL: Claf cyntaf Cymru'n annog positifrwydd

Fe fydd siopau, sy'n gwerthu nwyddau ar wahân i nwyddau hanfodol, yn cael ailagor yng Nghymru dydd Llun.

Ond mae'r canllawiau i beidio teithio mwy na phum milltir yn parhau yn eu lle.

Mae disgwyl, maes o law, y bydd yna lacio pellach fydd yn rhoi'r hawl i bobl ymweld ag atyniadau twristiaeth, ac i deithio i wahanol fath o lety fel tai gwyliau neu garafanau.

Bydd siopau sydd ddim yn rhai angenrheidiol yn cael caniatâd i ailagor o ddydd Llun

Ond fe fydd yn rhaid i newidiadau gael eu cadarnhau pan fydd yr adolygiad nesa i'r canllawiau ar 9 Gorffennaf.

Dywedodd Mr Campbell: "Rydym wedi colli lot fawr....fe gollom ni'r Pasg a dwy Ŵyl y Banc.

"Roedd hyn wedi dechrau brifo cyn y cyfnod clo oherwydd bod pobl wedi dechrau gweithio o'u cartrefi.

"Roedd yna leihad yn ymwelwyr rhyngwladol, felly fe gafodd y diwydiant ei daro yn gynnar.

"Mae pobl yn dioddef. Mae'n sefyllfa hynod o anodd felly roedd yna deimlad ryddhad mawr ddydd Gwener."

Cyfnod anodd

Yn 2018 fe wnaeth y sector gyfrannu £6.2bn i'r economi, gan gyflogi 132,000.

Mae'r prif weinidog Mark Drakeford yn cydnabod fod y diwydiant wedi cael nifer o fisoedd hynod anodd

Dywedodd wrth raglen Sunday Supplement BBC Radio Wales ei fod yn awyddus iawn i wneud yr hyn sy'n bosib er mwyn "achub be sy'n weddill o dymor yr haf ac y byddai yna groeso mawr i hynny.

"Ond fe ddaw hyn ar ôl beth sydd wedi bod yn gyfnod ofnadwy o anodd i'r diwydiant."