Buddugoliaeth ysgubol i Ferched Cymru

Helen Ward gafodd y gyntaf i Gymru yn yr hanner cyntaf

Cafodd ymgais Merched Cymru i gyrraedd pencampwriaeth Euro 2021 hwb gyda buddugoliaeth gyffyrddus yn erbyn Ynysoedd y Ffaro yng Nghasnewydd.

4 -0 oedd y sgôr yn y diwedd, ond roedd yna nerfusrwydd ar yr egwyl gan mai dim ond un gôl o fantais oedd gan Gymru bryd hynny er iddyn nhw reoli'r gêm yn llwyr.

Prin fod golwr Cymru, Laura O'Sullivan, wedi cyffwrdd y bêl yn yr hanner cyntaf, ond er gwaetha' sawl cyfle da roedd rhaid disgwyl tan 38 munud cyn i Gymru daro cefn y rhwyd.

Dyna pryd y daeth pas gyfrwys Jess Fishlock o hyd i Helen Ward yn y cwrt, ac fe rwydodd hithau'n daclus.

Roedd hi'n stori wahanol wedi'r egwyl.

Ail gôl Natasha Harding ar y noson, a'r drydedd i Gymru

Wedi 58 munud fe sgoriodd Tash Harding yr ail gyda'i throed chwith cyn ychwanegu'r drydedd gyda'i phen dri munud yn ddiweddarach.

Gan i Harding sgorio tair yn erbyn Ynysoedd y Ffaro y tro diwethaf i'w ddwy wlad gwrdd, maen nhw'n amlwg yn un o'i hoff wrthwynebwyr.

Lily Woodham gafodd y bedwaredd i Gymru, a'i gôl gyntaf hi i'r tîm cenedlaethol, wedi 67 munud, ac roedd y pwyntiau yn gwbl ddiogel erbyn hynny.

Mae'r fuddugoliaeth yn golygu fod Cymru'n dal yn ail i Norwy yn eu grŵp, ond mae'r gemau cyfartal gafon nhw yn erbyn Gogledd Iwerddon wedi costio'n ddrud.

Er hynny mae'r gêm nesaf yn gwbl allweddol wrth i Norwy ymweld â Chaerdydd nos Fawrth, 27 Hydref.