Adran Dau: Casnewydd 1-0 Port Vale
- Cyhoeddwyd
Kevin Ellison hawliodd y fuddugoliaeth i'r Alltudion yn y chweched munud o amser am anafiadau.
Sgoriodd Kevin Ellison gôl ddramatig mewn amser ychwanegol wrth i Gasnewydd guro Port Vale i aros ar frig Adran Dau.
Fe darodd Elllison ar ôl i Port Vale fethu â chlirio cornel yn ystod y chweched munud o amser am anafiadau.
Mae'r Alltudion dri phwynt yn glir ar frig y tabl tra bod Port Vale yn nawfed ar ôl eu trydydd colled yn olynol.
Chwaraeodd y ddwy ochr yn gystadleuol yn ystod hanner cyntaf difyr, gyda Liam Shephard yn cael tri chyfle da i Gasnewydd, a Jamie Proctor yn methu dod o hyd i'r targed.
Cafodd Port Vale hefyd eu cyfleoedd gydag ergydion David Worrall a Tom Conlon yn cael eu hatal gan Nick Townsend.
Fe frwydrodd Casnewydd yn galed yn yr ail hanner gydag ymdrech gan Brandon Cooper yn mynd dros y bar o gic gornel Matt Dolan.
Fe newidiodd y gêm wedi 68 o funudau gyda Legge yn gweld cerdyn coch.
Peniodd Padraig Amond a Cooper yn llydan wrth i Gasnewydd bwyso am gôl, cyn i Ellison sicrhau buddugoliaeth hwyr i'r tîm cartref.