Cymru 0-3 Canada: Grainger yn colli ei gêm gyntaf

Colli oedd hanes Merched Cymru yng ngêm gyntaf Gemma Grainger wrth y llyw, a hynny o 3-0 yn erbyn Canada.

Rhoddodd Grainger gap cyntaf i Ceri Holland yng nghanol y cae, wrth i Kayleigh Green ennill ei 50fed yng Nghaerdydd.

Ond yr ymwelwyr ddechreuodd orau, gan fethu cyfle da ar ôl 20 munud, ac yna mynd ar y blaen yn fuan wedyn drwy Deanne Rose.

Roedd Cymru'n cael trafferth creu cyfleoedd, ac ar ôl yr egwyl fe wnaeth yr eilydd Evelyn Viens ddyblu'r fantais.

• Gemma Grainger i arwain tîm pêl-droed merched Cymru

Roedd chwaraewyr Cymru'n hawlio cic o'r smotyn yn fuan wedyn, ar ôl i Tash Harding gwympo i'r llawr yn y cwrt cosbi, ond anwybyddu'r bloeddio wnaeth y dyfarnwr.

Daeth gôl olaf yr ymwelwyr gan Jessie Fleming, wnaeth grymanu'r bel i gornel uchaf gôl Laura O'Sullivan o 25 llath.

Fe wnaeth Cymru orffen y gêm yn bositif wrth i Esther Morgan ennill ei chap cyntaf, ond roedd Canada'n rhy gryf mewn gwirionedd, wrth iddyn nhw sicrhau'r fuddugoliaeth yn gyfforddus.