Tafarn yng Ngheredigion wedi derbyn hysbysiad cau

Roedd y safle eisoes wedi derbyn hysbysiad cau am dorri rheolau coronafeirws ym mis Hydref 2020

Mae tafarn yng Ngheredigion wedi cael dirwy o £2,000 ac wedi derbyn Rhybudd Cau Mangre ar ôl methu â chydymffurfio â Hysbysiad Gwella Mangre a thorri rheoliadau coronafeirws.

Fe wnaeth Tafarn Y Ffostrasol Arms ger Llandysul dderbyn y rhybudd ddydd Llun yn dilyn ymweliad gan swyddogion o Dîm Diogelu'r Cyhoedd Cyngor Ceredigion.

Tra oeddent ar y safle daeth y swyddogion ar draws rhagor o achosion o ddiffyg cydymffurfio.

Cafodd rheolwr y dafarn ei hysbysu o'r gwelliannau a oedd yn ofynnol a dywed wrtho y byddai Hysbysiad Cau Mangre a Hysbysiad Cosb Benodedig yn cael eu rhoi pe na fyddai'r dafarn yn bodloni'r gofynion.

Pan aeth y swyddogion i ymweld â'r adeilad eto ddydd Mercher 26 Mai, roedd ocsiwn gan gwmni Fred Davies & Co yn digwydd yno ac nid oedd tystiolaeth bod mesurau rhesymol ar waith i leihau'r risg o ledaenu coronafeirws ar y safle.

Gyda chymorth Heddlu Dyfed Powys, fe wnaeth y tîm ddychwelyd i'r dafarn ddydd Gwener 28 Mai i gyhoeddi Rhybudd Cau Mangre a Rhybudd Cost Benodedig.

Bydd y Tafarn Y Ffostrasol Arms yn parhau ar gau am 28 diwrnod, neu nes y gallant ddangos eu bod wedi gwneud y gwelliannau angenrheidiol i leihau'r risg o ledaenu coronafeirws ar eu safle.

Roedd y safle eisoes wedi derbyn hysbysiad cau am dorri rheolau coronafeirws ym mis Hydref 2020.

Fe gafodd cwmni ocsiwn Fred Davies & Co hefyd rhybudd wedi'r digwyddiad yn y dafarn.