Adran Dau: Harrogate 2-2 Casnewydd
- Cyhoeddwyd
Bu'n rhaid i Gasnewydd a Harrogate fodloni ar bwynt yr un yn dilyn gêm gyfartal yng ngogledd Lloegr nos Wener.
Aeth yr ymwelwyr ar y blaen o fewn tri munud, gyda Scott Bennett yn rhwydo gyda foli ar gyfer ei gôl gyntaf o'r tymor.
Hanner awr yn ddiweddarach fe ddaeth Harrogate yn gyfartal wrth i Jack Muldoon sgorio, ond funudau'n unig wedi hynny aeth yr Alltudion yn ôl ar y blaen.
Robbie Willmott sgoriodd gan benio croesiad Cameron Norman i gefn y rhwyd, cyn i Luke Armstrong unioni'r sgôr unwaith eto cyn hanner amser.
Mae'r canlyniad yn golygu bod Casnewydd yn codi i'r 14eg safle yn Adran Dau am y tro, gydag wyth pwynt o'u chwe gêm gyntaf.