Adran Dau: Casnewydd 0-0 Bradford

Bu'n rhaid i Gasnewydd a Bradford fodloni ar gêm gyfartal ddi-sgôr yn Rodney Parade brynhawn Sadwrn.

Roedd hi'n hanner cyntaf digon cyfartal, gyda Richard O'Donnell yn arbed ergyd Mickey Demetriou yn wych er mwyn atal cyfle gorau'r 45 munud cyntaf.

Fe wnaeth yr Alltudion barhau i bwyso yn yr ail hanner, wrth i beniad James Clarke daro'r trawst, ond ni lwyddodd yr un tîm i ganfod cefn y rhwyd.

Mae'r canlyniad yn golygu fod Casnewydd - sy'n dal heb reolwr parhaol yn dilyn ymadawiad Mike Flynn - yn disgyn i'r 13eg safle yn y tabl wedi 11 gêm.