Y Cymro cyntaf i sgorio tair yn yr NHL?
- Cyhoeddwyd
Nathan Walker yn dal tri 'pyc' yn dilyn buddugoliaeth yn erbyn y Detroit Red Wings yn yr Enterprise Center yn St Louis, Missouri, neithiwr
Ai dyma'r Cymro cyntaf i sgorio hattrick yn yr NHL (National Hockey League)?
Mae'n edrych felly. Cafodd hanes ei greu neithiwr wrth i Nathan Walker sgorio tair i St Louis Blues yn erbyn y Detroit Red Wings.
Mae'n cael y clod am fod yr Awstraliad cyntaf i wneud hynny yn y gynghrair. Mae hefyd yn enwog gan mai ef yw'r Awstraliad cyntaf erioed i chwarae yn yr NHL.
Ond cafodd Walker, 27, ei eni yng Nghaerdydd yn 1994, ac roedd yn byw yn y ddinas yn ystod ei flynyddoedd cynnar cyn i'w deulu fudo i Sydney pan oedd o'n ddwy oed.
Dyna ble ddechreuodd taith Walker ym myd Hoci Iâ ac mae ei yrfa wedi mynd o nerth i nerth.
Walker yn mwynhau'r clod yn dilyn y gêm
Mae ganddo 25 ymddangosiad i'r Washington Capitals, Edmonton Oilers a'r St Louis Blues dros y pum mlynedd diwethaf.
Cafodd ei alw i'r garfan mewn argyfwng o dîm y Springfield Thunderbirds, sef brawd bach y St Louis Blues, cyn rhoi perfformiad "aruthrol" neithiwr yn ôl cyfryngau'r Unol Daleithiau.
Walker, rhif 26, yn sgorio'i drydedd
Cymry'r byd Hoci Iâ
Nid Nathan Walker yw'r unig un sydd wedi cael ei eni yng Nghymru a chwarae yn yr NHL.
Cafodd Wilf Cude ei eni yn Y Barri, ddechrau'r 1900au. Pan oedd yn blentyn fe benderfynodd ei rieni symud i Winnipeg yng Nghanada i chwilio am waith. Chwaraeodd yn yr NHL dros y Philadelphia Quakers yn 1930-31.
Caniatáu cynnwys X?
Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X, dolen allanol a pholisi preifatrwydd, dolen allanol cyn derbyn. I weld y cynnwys yma dewiswch ‘derbyn a pharhau’.
Golgeidwad oedd Cude, ac aeth 'mlaen i chwarae dros rai o dimau hoci iâ mwya'r byd; y Boston Bruins, Chicago Black Hawks, Detroit Red Wings a'r Montreal Canadiens. Rhoddodd y gorau i chwarae yn 1941 cyn mynd 'mlaen i hyfforddi a gweithio fel sgowt. Bu farw yn 1968.
Daw Jack Evans o Garnant, Sir Gâr. Pan symudodd ei deulu i Drumheller yn nhalaith Alberta, Canada, ychydig iawn o Saesneg oedd ganddo. Chwaraeodd dros ddau o fawrion yr NHL, y New York Rangers a'r Chicago Black Hawks. Fe wnaeth ymddeol o chwarae yn 1972 yn 44 oed. Bu farw yn Manchester, Connecticut yn 1996.
Un arall a oedd yn chwarae i'r Chicago Blackhawks oedd Cy Thomas o Ddowlais. Yn 1948 fe symudodd i chwarae dros y Toronto Maple Leafs, cyn ymddeol yn 1952. Bu farw Thomas yn 2009.