Car ar dân wedi achosi difrod sylweddol yn Sir Gâr

Mae menyw o Sir Gâr wedi mynegi ei sioc wedi i'w char fynd ar dân yn ddireswm tu allan i'w cartref ac achosi difrod sylweddol i'w thŷ.

Dywedodd Lauren Griffiths, 37 o bentref Yr Hendy ger Pontarddulais eu bod wedi cyrraedd adref yn y Land Rover am 19:20 ar 21 Ionawr, a bod y cerbyd "yn fflamau" erbyn 19:45.

Bu'r gwasanaeth tân yno am ddwy awr yn ei ddiffodd, ond mae wedi achosi difrod sylweddol i'w cartref nhw a thŷ arall hefyd.

"Gyda chyfeiriad y gwynt roedd hi'n anochel y byddai'n achosi difrod i'r tŷ, a thŷ cymydog," meddai.

"Roedd o'n ffyrnig. Digwyddodd y cyfan mor sydyn."

"Fe allai fy mab wedi cael ei ladd - fe alla i fod wedi cael fy lladd," meddai Lauren Griffiths

Mae Ms Griffiths yn dweud nad ydy cwmni Land Rover yn cymryd cyfrifoldeb am y tân am fod y warantî ar y cerbyd wedi dod i ben saith wythnos ynghynt.

Dywedodd ei bod eisiau i'r cwmni egluro pam fod y cerbyd wedi mynd ar dân ac achosi cymaint o ddifrod.

"Fe allai fy mab wedi cael ei ladd - fe alla i fod wedi cael fy lladd," meddai Ms Griffiths.

"Beth pe bydden ni wedi bod yn ein gwelyau? Dydw i ddim eisiau meddwl am y peth."

Mae'r tân wedi achosi difrod sylweddol gartref y teulu

Dywedodd Land Rover mai "diogelwch cwsmeriaid yw ein blaenoriaeth" a'u bod yn cydymdeimlo â Ms Griffiths.

"Rydyn ni mewn cyswllt cyson gyda Ms Griffiths ac yn gwneud popeth o fewn ein gallu i'w chefnogi hi a'i theulu," meddai llefarydd.

Ychwanegodd eu bod yn fodlon cefnogi ymchwiliad gan gwmni yswiriant Ms Griffiths, a bod angen i'r cwmni yswiriant ymchwilio i ddechrau er mwyn peidio â chael effaith negyddol ar ei pholisïau yswiriant car a chartref.

Mae cymdogion wedi lansio ymgyrch i godi arian i'r teulu, sydd bellach wedi codi dros £2,600.