Urdd yn ymddiheuro am broblemau cofrestru Eisteddfod

Roedd "nifer uchel o ddefnyddwyr" ar wefan Yr Urdd, meddai'r mudiad

Mae'r Urdd wedi dweud bod rhai wedi methu cofrestru i gystadlu yn yr eisteddfod cyn y dyddiad cau ddydd Llun oherwydd trafferthion technegol.

Dywedodd y mudiad ei bod yn "ymwybodol bod rhai pobl yn cael problemau gyda system gofrestru" ar gyfer Eisteddfod yr Urdd 2022.

Roedd rhaid i ymgeiswyr ar gyfer yr eisteddfod gofrestru ar wefan Y Porth cyn 17:00 ddydd Llun.

Ond dywedodd yr Urdd nad oedd hynny'n bosib i bawb "oherwydd y nifer uchel o ddefnyddwyr".

Mae'r BBC wedi clywed gan un defnyddiwr oedd wedi methu defnyddio'r wefan ers 11:00 fore Llun.

Mae'r mudiad wedi "ymddiheuro am yr anghyfleustra".

Ychwanegodd datganiad pellach y byddai'r system gofrestru yn parhau ar agor tan hanner nos ar 17 Chwefror yn dilyn y trafferthion.

Dywedodd yr Urdd bod ei staff yn "delio gydag ymholiadau ac yn awyddus i helpu".

"Os ydy defnyddwyr a darpar gystadleuwyr yn cysylltu â'r Urdd drwy e-bost - [e-mail] - gydag unrhyw broblem, fe fydd aelod o'r tîm yn dod yn ôl atoch gyda datrysiad ac yn sicrhau fod pawb sydd wedi cysylltu yn gallu cofrestru i gystadlu."