Adran Dau: Sutton 1-1 Casnewydd

Fe sicrhaodd Casnewydd gêm gyfartal oddi cartref yn Sutton ar ddiwrnod agoriadol y tymor yn Adran Dau brynhawn Sadwrn.

Aeth y tîm cartref ar y blaen wedi 24 munud, wrth i Omar Bugiel rwydo wedi i ergyd chwaraewr arall o ymyl y cwrt cosbi daro'r trawst a gwyro i'w lwybr.

Ond roedd hi'n gyfartal unwaith eto cyn hanner amser, gydag Omar Bogle yn penio i gefn yn rhwyd o dafliad hir Mickey Demetriou.

Wedi i Bogle a Robbie Willmott wastraffu cyfleoedd i'r Alltudion yn yr ail hanner, roedd y ddau dîm yn edrych yn ddigon bodlon gyda phwynt yr un.