Actor arall yn cefnogi apêl i brynu fferm yn Eryri

Mae Ioan Gruffudd yn cefnogi apêl Llyndy Isaf hefyd

Mae'r actor Ioan Gruffudd wedi ymuno gyda'i gyfaill Matthew Rhys i gefnogi apêl yr Ymddiriedolaeth Genedlaethol i brynu Llyndy Isaf.

Daw'r cyhoeddiad am gefnogaeth yr actor o Gaerdydd ar y diwrnod y cyhoeddodd yr Ymddiriedolaeth eu bod £150,000 yn brin o'r nod o'r £1 miliwn.

Fe wnaeth Matthew Rhys gynorthwyo'r Ymddiriedolaeth i lansio'r apêl i brynu'r fferm fynydd 600 erw ym mis Mawrth.

Fe fydd yr arian, yn ôl yr Ymddiriedolaeth, yn sicrhau dyfodol y fferm 600 erw ar lan Llyn Dinas ger Nant Gwynant.

Yn ogystal â'r ddau actor, mae'r actores Catherine Zeta Jones hefyd yn cefnogi'r apêl.

Daw'r ymgyrch i godi'r £1 miliwn cyn diwedd y flwyddyn 13 mlynedd ers i Syr Anthony Hopkins gyfrannu swm sylweddol at apêl flaenorol yr Ymddiriedolaeth yn 1988 i "Arbed Yr Wyddfa" a phrynu stad Hafod y Llan am £3.5 miliwn.

Cyfle unigryw

"Pan fyddaf i'n meddwl am Gymru, fy mamwlad, mi fyddaf yn meddwl am ei morlin hardd a'i mynyddoedd godidog, y mannau hudol sydd heb eu sbwylio ac sy'n gwneud ein gwlad yn un arbennig," meddai Ioan Gruffudd.

"Yn awr mae gennym ni gyfle unwaith mewn oes i ddiogelu cornel fach o Eryri.

"Cefnogwch yr apêl, os gwelwch yn dda, fel y gall ein plant ryfeddu at harddwch y rhan yma o Gymru am flynyddoedd lawer o i ddod."

Dywedodd rheolwr eiddo'r Ymddiriedolaeth yn Eryri, Richard Neale, eu bod yn dal i chwilio am gyfraniadau.

"Fel y byddaf yn dweud yn aml, mae'r apêl rywbeth yn debyg i ddringo un o'n mynyddoedd: y darn olaf ydi'r anoddaf!

"Mae'r perchennog, Ken Owens, wedi rhoi tan ddiwedd y flwyddyn i ni godi'r arian felly mae yna lai na thri mis i godi £150,000.

"Rydyn ni'n hynod falch fod Ioan Gruffydd wedi addo ei gefnogaeth."