Porthladd: Cynllun ar gost o £100m

Y gred yw bydd y datblygiad yn costio mwy na £100m

Yn Abergwaun mae cynlluniau newydd ar gyfer marina ac angorfa ar gyfer 450 o gychod.

Cwmni Conygar a'r cwmni fferi Stena Line sy'n cyflwyno cais cynllunio yr wythnos hon i Gyngor Sir Penfro ar gyfer codi marina, tai, promenâd ac ehangu'r porthladd.

Y cwmnïau sydd hefyd yn gyfrifol am gynlluniau i ddatblygu porthladd Caergybi ar Ynys Môn.

Y gred yw bydd y datblygiad yn costio mwy na £100m.

Hwb economaidd

Dywedodd arweinydd y cyngor sir, John Davies, fod porthladd Abergwaun "yn ganolog i economi gogledd y sir".

Mae Ystad y Goron, sy'n berchen ar wely'r môr ar arfordir Abergwaun, a Chyngor Sir Penfro, sy'n berchen ar lawer o'r porthladd, wedi croesawu'r cynllun.

Dywedodd Neil Jacobson, Pennaeth Gweithrediadau Arfordir Ystad y Goron, y byddai ailddatblygu'r porthladd yn hwb economaidd i'r ardal.

Mae'r cynllun yn cynnwys 253 o fflatiau, a llwyfan 19 erw fel bod modd ehangu porthladd Stena Line.

'Allweddol'

Byddai'r prosiect hefyd yn golygu promenâd newydd a mwy o lefydd parcio.

Dywedodd Michael McGrath, Cyfrawyddwr Stena Line Talaith y Môr Celtaidd: "Rydyn ni'n edrych ymlaen at ddatblygu'r cynlluniau hyn sy'n allweddol i'n busnes ac i'r economi leol."

Yn ôl arweinydd y cyngor sir, Mr Davies, fod ffydd cwmnïau mawr yn Sir Benfro yn galonogol.

"Does dim dwywaith fod angen y datblygiad i sicrhau dyfodol y porthladd ac i greu a chynnal swyddi yn yr ardal.

"Rydyn ni'n edrych ymlaen at dderbyn y cais cynllunio gan Conygar a Stena."