Cerddwr wedi marw ar ôl disgyn 150m ar Yr Wyddfa mewn tywydd drwg

Roedd John Aravinth wedi bod yn cerdded hefo'i dad a'i chwaer ym mis Mai, cyn mentro tua'r copa ar ei ben ei hun.

Bu farw cerddwr ar ôl disgyn dros 150m wrth ddringo'r Wyddfa ar ddiwrnod lle'r oedd tywydd gwael, clywodd cwest.

Roedd John Aravinth, 20 oed o Orllewin Sussex, wedi bod yn dringo'r mynydd gyda'i deulu ym mis Mai 2024, ond trodd ei dad a'i chwaer yn ôl oherwydd y tywydd.

Parhaodd Mr Aravinth ar y llwybr, ond yn ddiweddarach ffoniodd ei dad i ddweud ei fod ar goll ar y mynydd, clywodd y gwrandawiad yng Nghaernarfon.

Fe dderbyniodd yr heddlu dwy alwad o ffôn symudol Mr Aravinth a ddaeth i ben yn gynnar.

Fe gafodd ei ddisgrifio fel "pryderus iawn" ar yr alwad wrth holi am wasanaeth achub mynydd, ac roedd sŵn gwynt sylweddol yn y cefndir.

Clywodd y cwest nad oedd yr heddlu wedi cael ateb wrth geisio cysylltu'n ôl.

Roedd dros 35 o bobl yn rhan o'r ymgais 18 awr o hyd i achub Mr Aravinth.

Cafodd y tywydd gwlyb, gwyntog a chymylog ar y diwrnod ei ddisgrifio fel "difrifol a pheryglus".

Dywedodd uwch-grwner gogledd-orllewin Cymru, Kate Robertson ei fod "yn debygol ei fod wedi disgyn o ganlyniad i'r gwyntoedd cryfion, neu ei fod wedi llithro yn yr amodau tywydd peryglus".

Cofnododd mai damwain oedd ei farwolaeth.