Dafydd Elis-Thomas yn colli'r chwip

Dywedodd yr Arglwydd Elis-Thomas y byddai'n dadlau ei achos gerbron gwrandawiad

Mae Aelod Cynulliad Plaid Cymru, Yr Arglwydd Dafydd Elis-Thomas, wedi colli chwip ei blaid.

Dywedodd llefarydd ar ran Plaid Cymru na wnaeth "aelod o grŵp Plaid Cymru yn y Cynulliad Cenedlaethol bleidleisio yn y Senedd," hynny yw yn y bleidlais diffyg hyder yn y Gweinidog Iechyd.

Yn ôl y blaid, ni roddodd aelod Dwyfor Meirionnydd "reswm digonol am ei absenoldeb".

"O ganlyniad, mae'r chwip wedi'i thynnu'n ôl dros dro oddi wrth Dafydd Elis-Thomas cyn proses fewnol."

'Tyfu i fyny'

Yr un diwrnod roedd yn llywyddu seremoni raddio ym Mhrifysgol Bangor. Fe yw'r Canghellor.

Yn gynharach yn y dydd dywedodd wrth BBC Cymru: "Dwi'n meddwl ei bod o'n hen bryd i ni dyfu i fyny fel plaid ac i gymryd safbwynt mwy adeiladol ynglŷn â'n gwleidyddiaeth na jyst galw am bleidlais o ddiffyg hyder a bod yn gŵn bach neu'n ail feiolin i'r Ceidwadwyr.

"Dyna sy'n mynd o dan fy nghroen i fwya'."

Colli'r bleidlais o ddiffyg hyder yn Lesley Griffith wnaeth y gwrthbleidiau o 29-28.

Dywedodd yr Arglwydd Elis Thomas y byddai'n dadlau ei achos gerbron gwrandawiad disgyblu'r blaid.

"Byddaf yn dadlau nad oeddwn yn absennol heb reswm," meddai.

Bydd Plaid Cymru'n sefydlu panel ymchwilio a dywedodd arweinydd y blaid, Leanne Wood, nad oedd am ddweud unrhywbeth fyddai'n rhagfarnu'r canlyniad.

'Sosialydd da'

Dywedodd AC Llafur Llanelli, Keith Davies, wrth raglen CF99 BBC Cymru y byddai'n croesawu Dafydd Elis Thomas i rengoedd ei blaid.

"Mae e'n Sosialydd da iawn," meddai.

Dywedodd Jonathan Edwards, AS Plaid Cymru dros Ddwyrain Caerfyrddin a Dinefwr, fod rhaid aros i weld beth fyddai'n digwydd yn y broses ddisgyblu.

"Mae Dafydd Elis-Thomas yn athrylith o wleidydd," meddai.

"Mae gen i barch enfawr iddo fe ac mae ganddo rôl bwysig o hyd o fewn Plaid Cymru."