Di-sgor yn y gêm rhwng Cymru a Gweriniaeth Iwerddon
- Cyhoeddwyd
Doedd hi ddim yn gêm gofiadwy i'r gwylwyr
Di-sgor oedd hi yn y gêm gyfeillgar rhwng tîm pêl-droed Cymru a Gweriniaeth Iwerddon yn stadiwm Dinas Caerdydd.
Doedd hi ddim yn gêm gyffrous i'r gynulleidfa nac yn un gofiadwy.
Y chwaraewr Shane Long gafodd y cyfle gorau i Weriniaeth Iwerddon yn ystod y gêm dwywaith ac er i Johnny Williams a Craig Bellamy geisio sgorio dros Gymru ofer oedd eu hymdrechion.
Er bod Gareth Bale wedi ymuno yn sesiwn hyfforddi Cymru ddydd Llun, gwylio o'r fainc oedd o yn dilyn anaf i'w droed.
Fe ddaeth Gweriniaeth Iwerddon yn agos at sgorio gyda deg munud i fynd tan y chwiban olaf gyda Shane Long yn dod yn agos at rwydo.
Cafodd honno ei hatal a llwyddodd capten Cymru Ashley Williams i atal cyfle arall gan Paddy Madden.