Arddangos darluniau Da Vinci i ailagor oriel yn Abertawe

Mi fydd Oriel Glynn Vivian yn Abertawe yn ailagor yn hwyrach yn y flwyddyn gydag arddangosfa o ddarluniau gan Leonardo da Vinci.

Mae'r oriel wedi bod ar gau ers 2011 er mwyn cael ei adnewyddu. Roedd y broses honno i fod i gymryd tair blynedd, ond fe aeth y contractwyr gwreiddiol i'r wal yn 2013.

Mi fydd yr arddangosfa gyntaf ers yr adnewyddiad yn dod â 10 o ddarluniau Da Vinci o ddiwedd y 15ed ganrif a chychwyn y 16eg ganrif i'r ddinas ar fenthyg gan y Casgliad Brenhinol.

Mae'n debyg y bu'r darluniau'n rhan o gasgliad oedd yn eiddo i'r Brenin Siarl II yn yr 17eg ganrif.

Fe ddywedodd Robert Francis-Davies, sy'n gyfrifol am fenter, datblygu ac adfywio ar gabinet Cyngor Abertawe, fod gan "pobl Abertawe ac ymwelwyr lawer i edrych ymlaen tuag ato pan fydd yr oriel yn ailagor yn yr hydref."

Ychwanegodd: "Mae'r staff yn brysur yn gweithio ar arddangosfa o safon uchel a rhaglen addysgol a gweithdai fydd o fudd i gannoedd o filoedd o bobl.

"Mae'r darluniau hyn gan un o'r artistiaid mwyaf ac un o'r meddylwyr craffaf erioed o ddiddordeb i gynulleidfa genedlaethol a rhyngwladol, felly mae'n ffordd berffaith i ddechrau ein cynllun i atgyfnerthu enw'r oriel fel lle ar gyfer profiad diwylliannol rhagorol."

Oriel Glynn Vivian

• Cafodd yr oriel ei adeiladu mewn arddull Baróc Edwardaidd i arddangos casgliad celf Richard Glynn Vivian.

• Un rhan o'r adnewyddiad yw estyniad sy'n cysylltu rhannau o'r oriel gafodd eu hadeiladu yn 1911 a'r 1970au.

• Mae paentiadau gan Claude Monet, Augustus John a Kyffin Williams yn rhan o gasgliad yr oriel.

• Mae gan yr oriel hefyd gasgliad o borslen a tsieina Abertawe o bwys rhyngwladol.

• Bydd yr arddangosfa o ddarluniau Leonardo da Vinci yn agor ar 15 Hydref.