'Ryff geid' Steddfod Wrecsam i sêr Hollywood

Nage, nid dathlu ennill y ddeuawd Cerdd Dant mae Rob McElhenney a Ryan Reynolds ond dathlu dyrchafiad diweddaraf eu clwb pêl-droed, Wrecsam

Fydd Ryan a Rob yn mynd i'r Steddfod?

Ynghyd ag 'a fydd teilyngdod?' a 'sut dywydd fydd hi?', dyma un o'r cwestiynau sy'n cael ei holi fwyaf cyn y Brifwyl eleni.

Mae eu cefnogaeth i ardal Wrecsam a'u parch at y Gymraeg yn amlwg, mae eu ffrind Maxine Hughes yn cael ei hurddo ar y dydd Gwener, ac ar y dydd Sadwrn fe fydd eu tîm pêl-droed yn chwarae eu gêm gyntaf yn eu cynghrair newydd... digon i ddenu Ryan Reynolds a Rob McElhenney siawns?

Gyda hynny mewn golwg, dyma 'ryff geid' i'r Steddfod iddyn nhw neu unrhyw seren Hollywood arall sydd awydd dod draw i Eisteddfod Genedlaethol 2025.

Hollywood, Shmollywood

Os oes unrhyw un yn pwyntio tuag atoch chi ac yn sibrwd wrth rywun arall, cyn i chi wenu a chynnig eich llofnod, mae'n well i chi edrych tu ôl i chi. Mae'n ddigon posib bod eu sylw wedi ei hoelio ar gyn-enillydd y Rhuban Glas sy'n sefyll tu cefn i chi.

Tydi enwogrwydd Hollywood ddim yn yr un cae (neu Maes) ag enwogrwydd Steddfod.

Yr Orsedd

Na, dydych chi heb gamu ar set ffilm Marvel neu debyg efo degau o Supermen a Superwomen yn cyfarfod yn eu clogynnau gwyn, glas neu wyrdd. Nid arch-arwyr ydyn nhw, ond mae 'na Archdderwydd. Ac mewn ffordd maen nhw i gyd yn arwyr.

Dy dy dyyyy... dy dy dy dy dyyyyy...

Meddyliwch am seremoni'r Oscars ond heb yr angen i gystadlu am y wisg fwyaf crand gan fod pawb yn gwisgo'r un ffrog. Does na'm carped coch, dim ond gwair a thraciau metel. Sna'm champagne - ond fydd 'na banad.

Ac i'r rhai fydd yn cael eu hurddo, fe fydd y cyfan yn fwy emosiynol na ffilm Disney, a heb yr angen am feiolins i helpu dynnu'r dagrau.

Maxine Hughes

Fydd pawb yn ei hadnabod hi ar y Maes. A chyn i Wrecsam chwarae nesaf, fydd ganddi enw barddol.

Freebies i'r plant

Tydi sêr Hollywood ddim yn brin o geiniog ac nid rhieni pawb ar y Maes sy'n gallu fforddio prynu clwb pêl-droed. Ond os ydi'r plantos yn dod gyda chi, PLIS cofiwch hyn: waeth faint o bres sydd gan rywun, un o bleserau mawr y Steddfod i blant ydi mynd o gwmpas y stondinau yn chwilio am unrhywbeth sydd am ddim: y freebie Steddfod.

Efallai nad ydi o'n amgylcheddol glên, ac mae'n debyg nad ydych chi angen degau o feiros, bagiau cotwm, sticeri a goncs efo logos sefydliadau Cymreig arnyn nhw - ond mae'n rhan o'r traddodiad eisteddfodol i holl blant Cymry gasglu cymaint o 'freebies' â phosib.

Dyma'r 'trick or treat' Cymreig felly gadewch iddyn nhw fod.

Does neb rhy hen i freebies Steddfod

Amaturiaid proffesiynol

Ydych chi'n ystyried mynd i'r pafiliwn i weld côr meibion yn morio canu? Mae'n bosib y byddwch chi'n pendroni pam bod cymaint o gerddorion proffesiynol yng Nghymru yn edrych fel ffermwyr, labrwrs a chigyddion. Wel, dyna ydi nhw - nid cerddorion proffesiynol.

Er gwaethaf lefel uchel y perfformiadau ar y llwyfan yn yr holl gystadlaethau, amaturiaid ydi nhw - rhywbeth maen nhw'n ei wneud ar nosweithiau Llun glawog.

Ymarfer eich llinellau Cymraeg

Mae 'na dri chwestiwn Eisteddfodol sy'n SICR o godi. Os ydych chi eisiau gwneud argraff, pam 'na wnewch chi ymarfer eu gofyn nhw ac ymarfer eich atebion yn Gymraeg?

Dyma nhw:

1. Yda chi yma drwy'r wythnos?

2. Lle yda chi'n aros - y maes carafanau?

3. Sut mae'r teulu? (Fydd y person sy'n gofyn y cwestiwn yma i chi yn siŵr o adnabod eich wyneb, ond ddim cweit yn gwybod pwy ydych chi. Os ydyn nhw wedyn yn gofyn "Prifysgol Aberystwyth 1995?", gwenwch a dywedwch "Cofio Rhyng-gol '96?" a cherddwch i ffwrdd).

Cuddwisg

"Da ni'n nabod ein gilydd dwch?"

'Da ni'n wlad fechan, a phawb yn nabod pawb. Felly mae'n amhosib i unrhywun - sêr Hollywood neu beidio - groesi'r Maes mewn llai nag awr heb strategaeth.

Mae smalio bod ar y ffôn bob tro'n opsiwn da, neu beth am frasgamu efo copis cerddoriaeth wrth i chi geisio cyrraedd eich 'cystadleuaeth' mewn pryd. Gwnewch yn siwr bod y gân yn Gymraeg neu fyddwch chi yn y newyddion.

Fel arall, siwt Deadpool amdani.

Mwd a glaw

Roedd y dyn yma yn barod am y glaw yn Eisteddfod Pontypridd 2024

Mae'r Cymry Cymraeg yn cynnal eu prif ŵyl ddiwylliannol tu allan, mewn caeau, yng Nghymru ganol haf. Plot twist: ella fydd hi'n bwrw a gawn ni fwd.

Os felly, peidiwch â chwyno - welis a ponchos S4C ymlaen, ac awê. Lle 'da chi'n feddwl ydych chi, California?

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.