Ateb y Galw: Mali Harries
- Cyhoeddwyd
Yr actores Mali Harries sy'n Ateb y Galw yr wythnos yma ar ôl iddi hi gael ei henwebu gan Carl Roberts yr wythnos diwethaf.
Beth ydy dy atgof cyntaf?
Cael fy ngwthio yn y pram tuag at siop losin yn Abernant Road yn Aberdâr.
Pwy oeddet ti'n ei ffansio pan yn iau?
Scott Gibbs. Torres i ei lun allan o'r Western Mail pan gath e ei gap cyntaf.
Beth oedd y digwyddiad a gododd y mwya' o gywilydd arnat ti erioed?
Dwi ddim yn berson sy'n teimlo cywilydd yn hawdd, ond siŵr o fod Mam yn cael ei stopio gan yr heddlu ar y draffordd am yrru'n rhy araf!
Pryd oedd y tro diwethaf i ti grio?
Tra'n gwylio The Last Miners ar BBC.
Oes gen ti unrhyw arferion drwg?
Poeni am fod yn hwyr a brysio o amgylch gormod.
Dy hoff le yng Nghymru a pham?
Adre, ble mae nghalon.
Mali oedd yr actores orau yng ngwobrau BAFTA Cymru eleni am ei phortread o'r Ditectif Arolygydd Mared Lloyd yn Y Gwyll
Y noson orau i ti ei chael erioed?
Noson naeth fy ngŵr ofyn i mi ei briodi. O'dd y fodrwy ddyweddïo yn teimlo'n enfawr. Un fach yw hi, ond aeth fy ngŵr heb fwyd am wythnos i'w chael i mi o M&S!
Disgrifia dy hun mewn tri gair.
Cariadus, ffyddlon, penderfynol.
Beth yw dy hoff lyfr?
The Prophet - Kahil Gibran.
Byw neu farw, gyda phwy fyddet ti'n cael diod. Pam?
Marilyn Monroe i glywed y gwir am ddiwedd ei bywyd.
Beth oedd y ffilm ddiwethaf welaist di?
Anaml iawn yn cael y cyfle i weld ffilm, 'rwy wastad yn ffindo rhywbeth arall i'w 'neud!
Yr Ymadawiad gan Ed Talfan.
Ar dy ddiwrnod olaf ar y blaned, beth fyddet ti'n ei wneud?
Mynd am dro ar y traeth gyda ffrindie a'r teulu. Cael pawb at ei gilydd. Cynnau tân ar y traeth. Dathlu. Bwyd a gwin da.
Dy hoff albwm?
Joni Mitchell - Blue
Cwrs cyntaf, prif gwrs a pwdin - be fyddai'r dewis?
Wystrys / stêc / banoffee pie.
Petaset yn gallu bod yn rhywun arall am ddiwrnod, pwy fyddai o/hi?
Donald Trump er mwyn i mi fedru ymddiswyddo!
Ydy Tom Mathias newydd glywed canlyniad yr etholiad arlywyddol?