Ateb y Galw: Mici Plwm
- Cyhoeddwyd
Mici Plwm sy'n Ateb y Galw yr wythnos yma wedi iddo gael ei enwebu gan Dilwyn Morgan yr wythnos diwethaf.
Beth ydy dy atgof cyntaf?
Fe ges i fy ngeni yn 'llofft ffrynt' rhif 10, Sun Street Llan Ffestiniog - ma gen i frith atgof o rhywun yn dod i'r llofft i gau y ffenast achos fod yna 'ddrafft'.
Pwy oeddet ti'n ei ffansio pan yn iau?
Oedd gen i crush ar Sion Corn pob 'Dolig (ddim yn ei ffansio 'chwaith!).
Beth oedd y digwyddiad a gododd y mwya' o gywilydd arnat ti erioed?
Heb os - sefyll ar ben twmpath o dywod yn codi llaw ar tua tri chant o Girl Guides a oedd yn gwersylla ger glan y môr Morfa Bychan, ger Porthmadog - fe ddaeth Bob Thomas Obe yn slei a thynnu fy shorts i lawr.
Pryd oedd y tro diwethaf i ti grio?
Echdoe - pan syrthiais i oddiar set y beic ar y crossbar.
Lwcus mai Syr Wynff sy'n gyrru'r beic yma!
Oes gen ti unrhyw arferion drwg?
Dwi'n methu'n glir a thyfu er mod i'n byta fy llysiau i gyd.
Dy hoff le yng Nghymru a pham?
Llan Ffestiniog - dyna ble ges i fy ngeni a'm magu.
Y noson orau i ti ei chael erioed?
Pob noswyl Nadolig dros y 40 mlynedd ddiwethaf.
Disgrifia dy hun mewn tri gair
Bychan... crwn... tlws.
Beth yw dy hoff lyfr?
Y Beibl.
Byw neu farw, gyda phwy fyddet ti'n cael diod?
Emyr Huws Jones (a Sbardun) - fy mets gora i.
A nesa' heno 'Cavelera Rusticana'!
Beth oedd y ffilm ddiwethaf welaist di?
Gwylio Bambi am y 421fed tro neithiwr.
Ar dy ddiwrnod olaf ar y blaned, beth fyddet ti'n ei wneud?
Tacluso y ty 'cw.
Dy hoff albwm?
Cavelera Rusticana (Intermezzo).
Cwrs cyntaf, prif gwrs a phwdin - be fyddai'r dewis?
Y Cwrs cynta' a'r ail gwrs - 'Bwyd Môr'.
Petaset yn gallu bod yn rhywun arall am ddiwrnod, pwy fyddai fo/hi?
Syr Wynff ap Concord y Bos heb os.
Pwy sy'n Ateb y Galw yr wythnos nesaf?
Lyn Ebenezer.