Diddymu cwmni lladd-dy Farmers Choice ym Môn

Mae cwmni a oedd wedi gobeithio creu dros 100 o swyddi mewn lladd-dy ym Môn wedi cael ei ddiddymu wedi gorchymyn gan y llys.

Roedd y cwmni Farmers Choice Limited wedi cymryd drosodd hen safle Welsh Country Foods yn Gaerwen ddwy flynedd yn ôl, ac wedi lladd nifer cyfyngedig o ŵyn am gyfnod.

Y gobaith oedd ehangu'r busnes, ond erbyn dydd Iau, roedd y giât i'r safle wedi ei gloi, ac nid oedd modd cysylltu â neb o'r cwmni.

Mae'r Aelod Cynulliad lleol, Rhun ap Iorwerth, wedi dweud bod y newyddion yn "gam mawr yn ôl" ond dywedodd ei fod yn amlwg bod angen cyfleuster o'r fath ar Ynys Môn.

Mae'n obeithiol bod modd sefydlu lladd-dy ar y safle yn y dyfodol.

Dywedodd yr Aelod Cynulliad: "Mae hanes diweddar y diwydiant lladd-dai, nid yn unig yma ar Ynys Môn, ond mewn mannau eraill hefyd, yn dweud wrthym fod y sector yn mynd drwy gyfnod anodd iawn iawn."

"Ond rwy'n dal yn argyhoeddedig bod angen y cyfleuster i ryw raddau ar Ynys Môn."

Fe gollodd mwy na 300 o bobl eu swyddi pan gaewyd y gwaith gan Welsh Country Foods yn 2013.