Pont Y Bermo: Network Rail i fuddsoddi £20m

Mae Bont Bermo yn ymestyn dros Afon Mawddach, ac yn cysylltu Morfa Mawddach ger Arthog gyda'r Bermo

Bydd Network Rail yn buddsoddi dros £20m ar welliannau i Pont Y Bermo, mae BBC Cymru yn ei ddeall.

Roedd trên arbennig wedi teithio ar y llinell rhwng Yr Amwythig a Phwllheli ddydd Mawrth i nodi 150 mlwyddiant y bont.

Roedd locomotif yn tynnu cerbydau trên Rivera Mark 1 yn mynd a theithwyr ar draws canolbarth Cymru i Bwllheli gan deithio dros y draphont hanesyddol.

Cafodd y bont ei agor yn 1867, ac mae wedi goroesi rhyfeloedd byd, ffrwydron môr ac ymosodiad gan bryfed pren morol - sy'n dipyn o gamp o ystyried fod y mwyafrif o'r bont wedi ei gwneud o bren.

Buddsoddi

Yn siarad ar ddiwrnod y 150 mlwyddiant dywedodd Bill Kelly, prif swyddog gweithredol Network Rail Wales, ei fod yn "newyddion gwych" a fyddai'n sicrhau dyfodol y bont "am yr 150 mlynedd nesaf".

Ychwanegodd Mr Kelly: "Rydym yn cynllunio - ac rydyn ni'n gobeithio y bydd y cynlluniau yn cael eu cymeradwyo ddydd Gwener - i wario dros £20m ar y bont rhwng 2019 a 2024.

"Felly mae hynny yn gyfnod cyffrous i ni, ac yn gyfnod cyffrous i'r bont ac i Reilffordd y Cambrian - mae'n newyddion gwych."

Roedd taith arbennig o'r Amwythig i Bwllheli i nodi'r 150 mlwyddiant

Dywedodd Bill Kelly o Network Rail bod y datblygiad yn "newyddion gwych"