Gwrthdrawiad A470: Arestio gyrrwr
- Cyhoeddwyd
Mae'r A470 yn parhau ar gau tua'r gogledd
Mae dyn wedi cael ei arestio yn dilyn gwrthdrawiad difrifol ar ffordd yr A470 yn Rhondda Cynon Taf.
Fe ddigwyddodd y gwrthdrawiad rhwng cerbydau Subaru Impreza a Honda Civic, ger cyffordd Nantgarw a Glan-bâd ychydig cyn 12:50 ddydd Mawrth.
Mae dyn 25 oed o Drefforest, oedd yn gyrru'r Subaru, wedi'i arestio ar amheuaeth o yrru dan ddylanwad cyffuriau.
Cafodd dyn 58 oed o ardal Sblot o Gaerdydd, oedd yn gyrru'r Honda, ei gludo i Ysbyty Athrofaol Cymru gydag anafiadau difrifol ond nid yw ei fywyd mewn perygl.
Dywedodd llefarydd ar ran y Gwasanaeth Ambiwlans eu bod wedi anfon parafeddygon a cherbyd ymateb brys i'r lleoliad, yn ogystal â thîm ymateb i ardal beryglus.
Cafodd ambiwlans awyr hefyd ei anfon i'r digwyddiad i gefnogi'r criwiau.
Fe gafodd y ffordd ei chau am gyfnodau ond mae'r ddwy lon bellach wedi ailagor.
Mae'r heddlu yn apelio ar unrhyw un a welodd y naill gerbyd yn cael eu gyrru ychydig cyn y gwrthdrawiad i gysylltu â nhw ar 101.