Tair aur, dwy arian ac efydd arall i Gymru yn y Gemau

9 Ebrill 2018

Hollie Arnold yn ennill yr aur — Disgrifiad o’r llun,
Cipiodd Hollie Arnold yr aur gyda'i thafliad olaf

Mae Cymru wedi ennill tair medal aur arall ddydd Llun yng Ngemau'r Gymanwlad yn Arfordir Aur.

Fe enillodd Daniel Salmon a Marc Wyatt yr aur yn y bowlio i barau ar ôl curo Alex Marshall a Paul Foster o'r Alban, a enillodd y fedal aur bedair blynedd yn ôl.

Daeth yr aur fwyaf dramatig yn y gystadleuaeth taflu'r waywffon F46 i Hollie Arnold, wrth iddi dorri'r record byd.

Alys Thomas enillodd fedal aur gyntaf Cymru yn y pwll, gan ennill y 200m dull pili-pala mewn amser o 2:05.45.

Yn y gawell saethu, roedd yna fedal arian i Ben Llewellin tra bod Latalya Bevan wedi cipio'r arian yn y gystadleuaeth llawr yn y gymnasteg artistig.

Mae Tesni Evans wedi ennill y fedal efydd wrth guro Nicol David o Malaysia yn y gêm am y trydydd safle yn y sboncen i ferched - y fedal gyntaf i Gymru ar y cwrt sboncen ers 20 mlynedd.

Disgrifiad o’r llun,
Dyma ydy'r trydydd tro i Marc Wyatt gystadlu yng Ngemau'r Gymanwlad, ac fe enillodd fedal efydd yn Glasgow yn 2014

Yn rownd gynta'r gystadleuaeth gwaywffon F46 roedd Holly Robinson o Seland Newydd wedi torri'r record byd, gan adael Arnold yn yr ail safle.

Ond yna yn y rownd olaf, fe dorrodd Arnold y record yna gyda thafliad anferth ei hun o 44.43m i gipio'r aur.

Latalia Bevan — Disgrifiad o’r llun,
Fe wnaeth Latalya Bevan gipio'r fedal arian yn y gystadleuaeth llawr yn y gymnasteg artistig

ben llewellin — Disgrifiad o’r llun,
Daeth medal arian hefyd i Ben Llewellin

Mae cyfanswm medalau Cymru yn y gemau hyd yma yn 16 o fedalau, sy'n cynnwys chwe medal aur, chwe arian a phedair efydd.

Yn y cyfamser mae'r cyn-bencampwr dros y clwydi, Dai Greene, wedi gorfod tynnu'n ôl o gystadlu ar ôl anafu ei goes tra'n ymarfer.