Iawndal i deulu wedi gwyliau mewn gwesty lle bu farw cwpl

Bu farw John a Susan Cooper o Sir Gaerhirfryn yn ystod ei gwyliau yn Yr Aifft

Mae wedi dod i'r amlwg bod teulu o dde Cymru fu'n aros mewn gwesty yn Yr Aifft lle bu farw dau ymwelydd o Brydain wedi cael iawndal.

Cafodd y teulu Valu, sy'n bedwar o Gasnewydd, iawndal gan gwmni gwyliau Thomas Cook am fethu â sicrhau safonau hylendid yng ngwesty Steigenberger Aqua Magic yn ardal Hurghada.

Mae'r gwesty eisoes wedi dod i'r amlwg yn dilyn marwolaeth cwpl o Burnley, Sir Gaerhirfryn yno ar 21 Awst eleni.

Fe wnaeth John a Susan Cooper ddechrau teimlo'n sâl yn ystod eu gwyliau a bu farw Mr Cooper, 69 oed, yn ei ystafell wely ac yn ddiweddarach Mrs Cooper, 63, yn yr ysbyty.

Mae ymchwiliad yn cael ei gynnal i achos eu marwolaeth, ar ôl i'w merch ddweud bod y ddau yn "berffaith iach" ychydig oriau cyn iddyn nhw farw.

£26,000

Tra ar wyliau yn Yr Aifft yn 2016, fe wnaeth y teulu Valu ddechrau teimlo'n sâl ar ôl bwyta bwyd o'r gwesty yn unig.

Roedd y cwmni wedi'u cyhuddo o fethu â sicrhau fod bwyd a diod y gwesty yn "ddiogel i'w fwyta" a bod caniatâd i fwyd gael i "ail weini a'i ail ddefnyddio ar fwy nag un achlysur".

Llwyddodd y teulu i ennill £26,000, gan gynnwys costau, gan gwmni Thomas Cook yn dilyn achos llys, ar ôl i'w cwynion cychwynnol gael eu hanwybyddu.

Mae gwesty Steigenberger Aqua Magic yn ardal Hurghada yn Yr Aifft

Yn ôl y teulu Valu, roedden nhw wedi dioddef poenau yn eu stumog am tua dau fis yn dilyn y gwyliau.

Yn ôl cyfreithiwr ar ran y teulu, roedden nhw wedi dechrau sylwi fod tymheredd y bwyd yn wahanol i'r arfer pan oedd yn cael ei weini.

Yn ystod yr achos yn Llys Sirol Casnewydd, daeth i'r amlwg fod gwaith papur ar hylendid a thymheredd wedi cael ei lenwi'n gamarweiniol gan aelod o staff yn y gwesty.

'Diogelwch yw'r prif flaenoriaeth'

Mae Thomas Cook wedi cadarnhau mai'r tro diwethaf i arolwg gael ei gynnal o westy Steigenberger Aqua Magic oedd ym Mehefin 2018.

Mae Prif Weithredwr Thomas Cook, Peter Frankhauser eisoes wedi hedfan i'r Aifft er mwyn cael caniatâd gan yr awdurdodau yno i ymweld â'r ystafell lle fuodd Mr a Mrs Cooper yn aros.

Mae Mr Frankhauser wedi dweud nad oes "tystiolaeth gadarn i awgrymu beth wnaeth achosi'r marwolaethau", ond mae wedi sicrhau ei fod yn awyddus "i ddod i gasgliad yn fuan ynglŷn â'r achos".

Ychwanegodd llefarydd ar ran Thomas Cook: "Diogelwch ein cwsmeriaid yw ein prif flaenoriaeth, ni fuaswn fyth yn anfon cwsmeriaid i westy nad ydyn ni'n credu sy'n ddiogel.

"Rydym yn cynnal arolwg ar y 3,000 o'n gwestai craidd yn flynyddol, a hyd yma eleni mae 47 wedi'u tynnu oddi ar ein rhestr am resymau iechyd a diogelwch, tra bod 150 heb gyrraedd ein gofynion o ran safon."