Rhybudd i deithwyr ar gyfer Dydd y Farn yng Nghaerdydd

Oherwydd y cynnydd mewn traffig mae trefniadau parcio arbennig a nifer o gyfleusterau Parcio a Theithio ar gael

Mae Cyngor Caerdydd wedi rhybuddio pobl sy'n bwriadu teithio i Gaerdydd ddydd Sadwrn y dylid cynllunio eu siwrne o flaen llaw er mwyn osgoi trafferthion.

Daw'r rhybudd wrth i Ddydd y Farn ddychwelyd i'r brif ddinas eto eleni.

Bydd y Dreigiau yn wynebu'r Scarlets am 15:00 brynhawn Sadwrn, gyda Gleision Caerdydd yn herio'r Gweilch am 17:15 yng nghystadleuaeth y Pro14.

Fe wnaeth dros 60,000 o gefnogwyr fynychu'r digwyddiad y llynedd, ac mae disgwyl tua'r un nifer yn Stadiwm Principality y penwythnos hwn.

Y Scarlets a'r Gweilch oedd yn fuddugol ar Ddydd y Farn 2018

Bydd yr holl ffyrdd yng nghanol y ddinas ar gau rhwng 13:00 a 20:00 ac mae disgwyl i wasanaethau trên fod yn brysur trwy'r dydd.

Mae Trafnidiaeth Cymru wedi annog teithwyr i gyrraedd Caerdydd mor gynnar â phosibl.

Bydd Heol y Frenhines yn cau am 17:00 a bydd system giwio ar waith ar ôl y gêm yng Ngorsaf Caerdydd Canolog.

Mae cefnogwyr yn cael eu cynghori i adael bagiau mawr adref a cheisio cyrraedd y stadiwm mor fuan â phosib.

Gallwch ddod o hyd i gyngor teithio pellach ar wefan y cyngor.