Cau rhan o reilffordd yn y gogledd yn dilyn tirlithriad
- Cyhoeddwyd
Dywedodd Network Rail fod y tirlithriad wedi digwydd yn y twnnel ger Blaenau Ffestiniog
Mae rhan o reilffordd Dyffryn Conwy rhwng Llanrwst a Blaenau Ffestiniog wedi cau oherwydd tirlithriad.
Dywedodd Network Rail bod cerrig mawr wedi disgyn ar y llinell yn Nhwnnel Blaenau Ffestiniog, gan atal trenau rhag gallu pasio.
Fydd y gwasanaeth rhwng gorsafoedd Gogledd Llanrwst a Blaenau Ffestiniog ddim yn rhedeg eto nes o leiaf 09:00 ddydd Gwener, wrth i'r gwaith atgyweirio ddigwydd.
Yn y cyfamser mae bysus yn cael eu trefnu i gludo teithwyr rhwng y ddwy orsaf, a'r bwriad yw y bydd y drefn honno'n parhau ddydd Iau.