Tyllau mawr yn ymddangos ar gae chwarae dros nos
- Cyhoeddwyd
Mae un twll ar gae chwarae yng Ngwaelod-y-Garth yn fwy na'r llall
Mae Cyngor Caerdydd yn ymchwilio ar ôl i ddau lyncdwll (sinkhole) ymddangos ar gae chwarae yn y ddinas dros nos.
Dywedodd llefarydd nad oedd modd cadarnhau beth achosodd y tyllau yng Ngwaelod-y-garth.
Ond fe ddywedodd Gwasanaeth Tân ac Achub De Cymru eu bod wedi cael eu galw i "adroddiadau o lifogydd" fore Gwener.
Mae swyddogion asesu risg llifogydd y cyngor wedi'u hanfon i archwilio, ac mae staff priffyrdd yr awdurdod wedi cael gorchymyn i wneud yr ardal yn ddiogel.
Maen nhw bellach wedi rhoi tâp o gwmpas un cornel o'r cae pêl-droed er mwyn annog pobl i beidio mynd yno.
Dywedodd y gwasanaeth tân eu bod wedi cael eu galw am 05:47, a'u bod wedi cael gwared ar ddŵr, cyn gadael toc wedi 08:00.
