Jean Rhoades: Teithio dros 6,000 o filltiroedd i'w heisteddfod olaf?

Yn Eisteddfod Genedlaethol Llŷn ac Eifionydd 2023, fe ddaeth Jean Rhoades sy'n dod o Landderfel ger Y Bala'n wreiddiol, ond sy'n byw yn Albuquerque, New Mexico ers 1956 yn ychydig o 'seléb'.

Roedd Jean wedi teithio dros 6,000 o filltiroedd i'r maes ym Moduan ar ei phen ei hun yn 92 mlwydd oed, ac fe aeth y clip teledu ohoni hi a'r cyflwynydd Eleri Siôn yn feiral.

Bob yn ail blwyddyn, pan fydd yr eisteddfod yn y gogledd, bydd Jean yn dychwelyd i Gymru i weld ei theulu yn Y Bala ac i fynd i'r Eisteddfod. Ei threfn yw eistedd yn y pafiliwn drwy'r dydd er mwyn mwynhau'r cystadlu. Mae Jean yn aelod o'r orsedd am sefydlu cymdeithas Gymraeg yn Albuquerque.

Cyn iddi hedfan yn ôl i Albuquerque fis Awst 2023, fe aeth Cymru Fyw i weld Jean yng nghapel ei phlentyndod, sef Capel Tegid, Y Bala.

Pan ofynnodd Cymru Fyw iddi a oedd hi'n bwriadu dod i Eisteddfod Wrecsam mewn dwy flynedd, dywedodd: "Fydda i'n 94 erbyn hynny, hwyrach ddo'i i Wrecsam, gawn ni weld."

Ddwy flynedd yn ddiweddarach, a ddwy flynedd yn hŷn, mae Jean wedi cyrraedd maes Eisteddfod Wrecsam 2025 ar ôl gwneud y daith bell ar ei phen ei hun yn 94 mlwydd oed.

Gwyliwch Jean yn dweud beth mae hi'n edrych ymlaen ato dros y dyddiau nesaf.

Yn ôl Jean, "Wrecsam fydd ei heisteddfod olaf, ond gawn ni weld". Gyda'r holl deithio pwy all feio Jean, ond gobeithio wir y bydd Cymru Fyw'n cael sgwrs arall gyda hi ar y maes ymhen dwy flynedd arall.

Eleri Siôn yn cyfweld Jean Rhoades yn Eisteddfod Llŷn ac Eifionydd yn 2023

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.