Pryder am ddyfodol 229 o swyddi The Book People, Bangor
- Cyhoeddwyd
Mae gan The Book People siop ym Mharc Menai, Bangor
Mae cwmni The Book People - sydd â chanolfan yn ninas Bangor - wedi mynd i ddwylo'r gweinyddwyr.
Mae'r cwmni yn cyflogi cyfanswm o 348 o bobl, gyda 229 o'r rheiny yn gweithio yn y ganolfan ym Mangor.
Maen nhw wedi wynebu cystadleuaeth gref gan Amazon a manwerthwyr ar-lein eraill dros y ddegawd ddiwethaf.
Penodwyd PricewaterhouseCoopers (PwC) yn weinyddwr tra bod y cwmni, gafodd ei sefydlu yn 1988 yn Surrey, yn chwilio am brynwr.
Bydd y busnes yn parhau i fasnachu ac nid oes unrhyw gynlluniau i ddiswyddo unrhyw un o'r 348 o weithwyr ar draws y Deyrnas Unedig, meddai PwC.
O ganlyniad, dylai cwsmeriaid dderbyn eu harchebion mewn pryd ar gyfer y Nadolig.
Mae'r cwmni'n gwerthu llyfrau, anrhegion, teganau a deunydd ysgrifennu ar-lein a thrwy gatalog, yn aml am brisiau gostyngedig.
Mae gan y cwmni drosiant blynyddol o £50m ac mae'n gwerthu mwy na 17 miliwn o lyfrau plant y flwyddyn, yn ôl PwC.