Gwesty Seiont Manor yn Llanrug heb dalu staff ar amser

Mae gwesty moethus yng Ngwynedd wedi dweud y bydd staff yno'n cael eu talu yn dilyn protestio cyhoeddus.

Mae rhaglen Newyddion 9 ar ddeall fod Seiont Manor yn Llanrug wedi ymddiheuro i'w staff am yr oedi cyn y Nadolig.

Wrth i nifer o aelodau staff brotestio tu allan i'r gwesty ddydd Mercher, mae'r rheolwyr wedi sicrhau gweithwyr y byddan nhw'n cael eu talu.

Daeth Newyddion 9 i wybod fod y gwesty wedi beio'r oedi ar anghydfod rhwng y cyfranddalwyr sy'n berchen ar yr eiddo.

Mae'r gwesty yn cael ei redeg gan gwmni o'r enw Seiont Manor Ltd, sy'n dal y denantiaeth.

Dywed rhai staff eu bod wedi gorfod defnyddio banciau bwyd wrth aros i gael eu talu.

Roedd gweithwyr a oedd yn aros am eu cyflogau i fod i gael eu talu ar 7 Rhagfyr.

Mae tua 30 o bobl yn gweithio yng ngwesty Seiont Manor yn Llanrug

Ar ei wefan, mae Seiont Manor yn cael ei ddisgrifio fel "gwesty plasty moethus" yn "y lleoliad gwyliau mwyaf perffaith yng ngogledd Cymru".

Prynwyd Seiont Manor gan y datblygwyr Paul a Rowena Williams yn 2016, un o sawl eiddo mawr sydd ganddyn nhw yn yr ardal, gan gynnwys y plasty hanesyddol Plas Glynllifon, ger Caernarfon.

Ymunodd y cwpl â phartneriaeth ar Seiont Manor a Phlas Glynllifon gyda chwmni o'r enw Mylo Capital Ltd yn 2018.

Dywedodd Cyfreithwyr Glaisyers eu bod yn gweithredu ar ran Mr a Mrs Williams mewn perthynas ag anghydfod ynghylch cyfranddaliadau sy'n gysylltiedig â pherchnogaeth y gwesty.

Dywedodd Glaisyers mai "bwriad Mr a Mrs Williams oedd gwneud popeth yn eu gallu i adennill rheolaeth dros y gwesty a gwarchod ei fusnes a'i swyddi".

Ond dywedodd y cyfreithwyr na allan nhw wneud sylw pellach ar hyn o bryd oherwydd bod achos cyfreithiol "ar fin digwydd".

Nid yw BBC Cymru wedi gallu cysylltu â Mylo Capital Ltd.