Ben Davies: Barod 'i ddechrau'r tymor eto' gyda Tottenham

Fe ddylai'r amddiffynnwr Ben Davies a gweddill carfan Cymru fod yn paratoi ar gyfer eu gêm agoriadol yn Euro 2020 yr wythnos hon.

Y Swistir ym mhrifddinas Azerbaijan, Baku, oedd y gêm honno ar ddydd Sadwrn, 13 Mehefin.

Ond mae argyfwng coronafeirws yn golygu bod y gystadleuaeth wedi ei gohirio ac yn hytrach mae Davies yn paratoi at gwblhau'r tymor gyda'i glwb Tottenham.

Daeth y tymor pêl-droed i ben yn ddisymwth ym mis Mawrth ond fe fydd Uwchgynghrair Lloegr yn ail ddechrau'r mis hwn y tu ôl i ddrysau caeedig.

'Ysu' i gael chwarae

"Mae hi wedi bod yn amser eithaf neis, i fod yn onest, i gael rest," meddai Davies ar bodlediad Elis James' Feast of Football.

"Nawr mae'r corff yn teimlo'n berffaith eto ac mae pawb yn barod ac yn gyffrous iawn i ddechrau eto.

"Ers tair wythnos dda ni wedi bod ar y cae, yn y dechrau ar ben ein hunan a nawr gyda'n gilydd, ac rydyn ni'n barod i fynd nawr."

Fe ymunodd Ben Davies gyda Spurs o Abertawe yn 2014

Yn ystod y cyfnod clo fe gafodd Ben a'i gyd-chwaraewyr feic ymarfer yr un, a gafodd ei ddarparu gan y clwb, er mwyn iddyn nhw gadw'n heini.

Ac fel nifer fawr o bobl eraill, cafodd y feddalwedd fideo cynhadleddau 'Zoom' ei ddefnyddio er mwyn cadw mewn cysylltiad.

"Mae pawb yn gorfod setio'r laptop neu ffon lan mewn safle lle mae pawb yn gallu gweld," ychwanegodd y chwaraewr 27 mlwydd oed.

• Mwy gan Ben Davies ar bodlediad Elis James' Feast of Football

Roedd Davies yn aelod o garfan Cymru chwaraeodd yn rowndiau terfynol Euro 2016 yn Ffrainc - gyda thîm Chris Coleman yn cyrraedd y rownd gynderfynol, cyn colli yn erbyn Portiwgal.

Ond mae'r pandemig wedi golygu y bu'n rhaid gohirio Euro 2020 am flwyddyn ac mae gan Ben Davies deimladau cymysg am hynny.

Mae Ben Davies wedi ennill 52 cap dros Gymru ers ei ymddangosiad cyntaf yn 2012

"Ro' ni'n barod fel carfan i fynd y tymor yma ond rwy'n credu os ydyn ni'n cael blwyddyn arall gyda'n gilydd, mae pawb yn gallu gweithio i fod yn barod," meddai.

"Dwi'n credu os gallwn ni ymarfer yn dda, cysylltu gyda'n gilydd, yna mae'n mynd i helpu ni i gyd.

Mewn undod mae nerth

"Dwi'n credu yn y pedair gêm olaf o'r qualifiers mi oedd y tîm wedi dod gyda'i gilydd - ni 'di ffeindio ffordd sut i chwarae, a thîm sydd yn gwybod beth i wneud.

"Wrth i ni baratoi at y gystadleuaeth roedd hwnna'n deimlad da.

"Ond os ydyn ni'n gorfod aros am flwyddyn arall, efallai bod siawns 'da ni gadw hwnna i fynd.

Ben Davies yn dathlu gyda Gareth Bale

"Mae pawb yn credu ein bod ni'n dîm sydd yn gallu bod yn llwyddiannus iawn.

"Mae lot o chwaraewyr 'da gyda ni y tro yma ac os ydych chi'n edrych ar yr enwau yn y garfan, siŵr o fod bydd pawb yn dweud bod y tîm yma yn dîm gwell na'r tro diwethaf.

"Mae'n rhaid i ni ddangos hynna, rhaid i ni aros yn gadarn a brwydro i fod y tîm gorau 'da ni'n gallu bod."