'Sgwteri trydanol yn opsiwn gwahanol i geir' yng Nghymru

Mae sgwteri trydanol i'w gweld yn aml yng Nghaerdydd, er bod defnyddio rhai preifat yn anghyfreithlon

Fe allai pobl yng Nghymru fod yn teithio ar sgwteri trydanol i'w gwaith a gweld ffrindiau yn fuan.

O ddydd Sadwrn ymlaen bydd sgwteri o'r fath yn gyfreithlon yn y DU am y tro cyntaf.

Mae rhai personol wedi'u gwahardd rhag cael eu defnyddio ar strydoedd, ond bydd hawl i rai sy'n cael eu rhentu fel rhan o gynllun gan Lywodraeth y DU gael eu defnyddio.

Mae Llywodraeth Cymru'n dweud bod hwythau yn edrych ar y posibilrwydd o sefydlu system rhentu sgwteri.

Ystyried treialon yng Nghymru

"Mae sgwteri trydanol yn cynnig y potensial am drafnidiaeth carbon-isel, gan gynnig opsiwn gwahanol i geir, yn enwedig ar gyfer teithiau mewn ardaloedd dinesig," meddai llefarydd o Lywodraeth Cymru.

"Ry'n ni wedi cychwyn sgwrs â Llywodraeth y DU i drafod y potensial am dreialon yn nhrefi a dinasoedd Cymru, ac wedi hysbysu'r cyfle i awdurdodau lleol.

"Bydd maint y treial yn dibynnu ar lefel y diddordeb gan awdurdodau lleol."

Mae sgwteri trydanol yn cael eu gweld fel opsiwn gwahanol i geir a thrafnidiaeth gyhoeddus

Dan reolau newydd Llywodraeth y DU bydd caniatâd i sgwteri trydanol sy'n cael eu rhentu fynd ar y ffyrdd er mwyn lleddfu'r pwysau ar drafnidiaeth gyhoeddus yn ystod y pandemig.

Mae awdurdodau lleol yng Nghymru, Lloegr a'r Alban yn gallu sefydlu system rhannu sgwteri - tebyg i gynllun nextbike yng Nghaerdydd - fel rhan o dreial 12 mis.

Bydd angen i bawb sy'n eu defnyddio fod â thrwydded lawn neu dros dro ar gyfer car, beic modur neu moped, a bod dros 16 oed.

Ni fydd hawl eu defnyddio ar y palmant a'u cyflymder uchaf fydd 15.5mya.

Ond mae problem arall yng Nghymru - pe bai cyngor yn penderfynu ei fod eisiau cymryd rhan, byddai'n rhaid newid y gyfraith er mwyn galluogi i'r sgwteri gael eu defnyddio ar lwybrau seiclo.

Mae Llywodraeth y DU yn gobeithio y bydd y cynllun rhannu sgwteri cyntaf yn weithredol yn Middlesbrough yr wythnos nesaf.