'Anhygoel': Ymateb cefnder Neco Williams i'r gôl

Neco Williams yn dathlu'r gôl fuddugol yn erbyn Bwlgaria ddydd Sul

Dyw Dafydd Evans o Borthmadog ddim yn gallu coelio'r hyn ddigwyddodd yn ystod gêm bêl-droed Cymru brynhawn dydd Sul.

Roedd gweld ei gefnder yn dod ar y cae fel eilydd ac yn cipio'r fuddugoliaeth yn erbyn Bwlgaria i Gymru yn "unbelievable" meddai.

"O'n i methu coelio'r peth a deud y gwir wrthoch chdi," meddai wrth raglen Post Cyntaf.

"Mae o yn un peth gwatshiad o'n chwarae i Lerpwl, mae'n beth hollol wahanol gweld o'n sgorio i Gymru."

• Cynghrair y Cenhedloedd: Cymru 1-0 Bwlgaria

• Teulu yn falch o lwyddiant seren ifanc Lerpwl

Fe beniodd Neco Williams y gôl fuddugol yn eiliadau olaf y gêm yng Nghynghrair y Cenhedloedd, yn ei ail ymddangosiad i'r tîm cenedlaethol.

Mae'r dyn ifanc 19 oed, sy'n chwarae i Lerpwl, wedi dweud bod y foment aeth y bêl i mewn yn un "swreal".

Yn Wrecsam y cafodd Neco Williams ei eni a'i fagu ac mae ei rieni yn Gymry gyda'i dad yn gallu siarad Cymraeg.

Ac er ei fod yn gymwys i chwarae i Loegr trwy berthynas deuluol doedd hynny ddim yn ystyriaeth, meddai wrth y BBC.

"Roedd Lloegr yn trio ffonio fy asiant lot ac eisiau siarad gyda fi ond doeddwn i ddim isio gwybod.

"Mae fy nheulu yn Gymraeg, dwi'n Gymro ac mae fy ffrindiau yn Gymraeg. Felly Cymru oedd hi am fod o'r dechrau," meddai.

'Pawb yn sgrechian dros y lle'

Mae Dafydd Evans wedi hen arfer gweld ei gefnder ar y cae pêl-droed.

"Dwi 'di bod yn gwatshiad o dros y blynyddoedd a bob tro mae o'n mynd ymlaen a bob tro mae 'na chance iddo fo sgorio de."

Neco Williams (ar y chwith) yn dathlu wedi i Lerpwl gael eu cyflwyno gyda thlws Uwch Gynghrair Lloegr

Gyda rhieni a theulu Neco Williams yn Wrecsam oedd Dafydd Evans pan wnaeth o sgorio'r gôl. Mae'n dweud fod yr ymateb wedi bod yn wallgof.

"Odd o jest yn nuts, absolutely nuts, pawb yn sgrechian dros y lle a bob dim. Unreal o deimlad."

Ac mae'n dweud nad ydy o yn gallu dweud mewn geiriau pa mor falch ydy o o Neco.

"O watshiad o yn yr under-9s pan oedd o'n hogyn bach i watshiad o yn cael ei gôl gyntaf i Gymru, mae o jest yn unbelievable a gobeithio geith o lot mwy hefyd!"

'Abl' i guro Lloegr

Lloegr yw gwrthwynebwyr nesaf Cymru mewn gêm gyfeillgar fis nesaf.

Y tro diwethaf iddyn nhw gyfarfod oedd ym mhencampwriaeth Euro 2016. Mae'r cefnwr yn hyderus bod gan Gymru'r gallu i'w curo.

"Gyda'r ansawdd sydd gyda ni yn y tîm 'da ni'n mynd i brofi iddyn nhw ein bod ni yn ddigon abl i'w curo. Dwi'n siŵr y bydd hi'n gêm grêt.

"Mae'r bechgyn i gyd yn edrych ymlaen a methu aros tan y gêm," meddai Neco Williams.

Un dymuniad sydd gan Dafydd Evans - y bydd ei gefnder yn cael dechrau y 90 munud y tro hwn.