Rhybudd melyn am law trwm yn y rhan fwyaf o Gymru

Nant PerisCyngor Gwynedd

Caeodd yr A4086 yn Nant Peris oherwydd llifogydd

Mae'r Swyddfa Dywydd wedi cyhoeddi rhybudd tywydd newydd am law trwm sy'n debygol o effeithio ar fwyafrif Cymru.

Daeth un rhybudd melyn i rym am 09:00 fore Iau ac yn parhau tan 23:59 nos Wener.

Mae'n berthnasol i bob un o siroedd Cymru heblaw Wrecsam a'r Fflint.

Cafodd rhai ffyrdd eu cau yng Ngwynedd ddydd Iau, yr A4086 yn Nant Peris a'r A498 rhwng Beddgelert a Phen y Gwryd, oherwydd llifogydd.

Roedd dros 20 o rybuddion i fod yn barod am lifogydd wedi eu cyhoeddi gan Gyfoeth Naturiol Cymru.

Mae rybuddion tebyg am law wedi'u cyhoeddi ar gyfer y penwythnos.

Y Swyddfa Dywydd

Mae'r rhybydd melyn yn berthnasol i ran helaeth o'r wlad

Fe allai 30-40 mm o law syrthio ar draws y 20 sir rhwng bore Iau a nos Wener.

Mae 50-80 mm o law'n debygol yn yr ucheldiroedd wrth i wyntoedd cryfion chwytho o'r de orllewin, a 100-150mm ym mynyddoedd a bryniau'r gogledd orllewin erbyn diwedd dydd Gwener.

Oherwydd yr amser o'r flwyddyn, mae'r Swyddfa Dywydd yn rhybuddio bod y gwynt a'r glaw'n debygol o achosi i'r coed golli mwy o'u dail. Gallai hynny gynyddu'r posibilrwydd o lifogydd wrth i ddraeniau a ffosydd flocio.

Mae'r rhybudd yn berthnasol i'r siroedd canlynol:

  • Abertawe

  • Blaenau Gwent

  • Bro Morgannwg

  • Caerdydd

  • Caerfyrddin

  • Caerffili

  • Casnewydd

  • Castell-nedd Port Talbot

  • Ceredigion

  • Conwy

  • Dinbych

  • Gwynedd

  • Merthyr Tudful

  • Mynwy

  • Pen-y-bont ar Ogwr

  • Penfro

  • Powys

  • Rhondda Cynon Taf

  • Torfaen

  • Ynys Môn

Y Swyddfa Dywydd

Map y rhybydd melyn ar gyfer dydd Sadwrn

Yr un siroedd fydd yn gweld glaw trwm wrth i rybudd gwahanol ddod i rym am 00:00 fore Sadwrn tan 21:00 nos Sadwrn.

Mae'r arbenigwyr yn darogan 20-30 mm yn rhagor o law yn gyffredinol, 40-60 mm ar dir uwch, ac 80-100 mm mewn ardaloedd mynyddig - yn arbennig, unwaith yn rhagor, yn y gogledd orllewin.

Mae rhybudd arall wedyn yn darogan patrwm tebyg ddydd Sul, rhwng 09:00 a 23:59, ond mae'r rhybudd yma hefyd yn cynnwys Sir Wrecsam, sy'n golygu taw ond Sir Y Fflint fydd yn osgoi tywydd garw'r dyddiau nesaf.