Cwpan FA Lloegr: Stevenage 0-2 Abertawe
- Cyhoeddwyd
Sgoriodd Viktor Gyökeres ei gôl gyntaf dros Abertawe gyda pheniad o groesiad Jordan Garrick
Mae Abertawe trwodd i bedwaredd rownd Cwpan FA Lloegr ar ôl trechu Stevenage o Adran Dau brynhawn Sadwrn.
Aeth Yr Elyrch ar y blaen wedi dim ond saith munud, gyda Wayne Routledge yn penio i'r rhwyd yn dilyn gwaith da gan Yan Dhanda.
Dyblwyd y fantais ar ddechrau'r ail hanner wrth i Viktor Gyökeres sgorio ei gôl gyntaf i'r clwb gyda pheniad arall, y tro yma o groesiad Jordan Garrick o'r asgell dde.
Llwyddodd Freddie Woodman i arbed cic o'r smotyn Luke Norris yn y munudau olaf er mwyn selio'r fuddugoliaeth i dîm Steve Cooper.
Bydd yr enwau'n dod allan o'r het ar gyfer y bedwaredd a'r bumed rownd nos Lun.