Cyhuddo dau ddyn yn dilyn lladrad Amgueddfa Sain Ffagan

Mae dau ddyn wedi eu cyhuddo yn dilyn lladrad yn Amgueddfa Werin Cymru yn Sain Ffagan.

Mae Gavin Burnett, 43, a Darren Burnett, 50, o Northampton wedi'u cyhuddo o ladrata.

Fe wnaeth y ddau ymddangos yn Llys Ynadon Northampton ddydd Mercher, ac maen nhw wedi cael eu cadw yn y ddalfa.

Mae dynes 45 oed o Sir Northampton hefyd wedi ei harestio fel rhan o'r ymchwiliad, ac mae wedi ei rhyddhau ar fechnïaeth.

Dywedodd Heddlu De Cymru eu bod yn parhau i ymchwilio i'r achos ar ôl cael eu galw i'r digwyddiad am tua 00:30 fore Llun.

Cafodd nifer o eitemau, gan gynnwys gemwaith aur o'r Oes Efydd, eu dwyn o arddangosfa yn y prif adeilad.

Mae'r llu yn parhau i chwilio am yr eitemau a gafodd eu dwyn.

Cafodd y ddau ddyn eu harestio brynhawn Mawrth

Dywedodd y Ditectif Arolygydd Bob Chambers, o Heddlu'r De: "Hoffem ddiolch unwaith eto i Heddlu Sir Northampton am eu cymorth yn ystod yr ymchwiliad, i'r amgueddfa am ei chefnogaeth, ac i aelodau'r cyhoedd a ymatebodd i'n hapêl am wybodaeth."

Yn y cyfamser, mae Heddlu Sir Northampton yn dweud bod y ddau ddyn hefyd wedi eu cyhuddo mewn cysylltiad ag achosion eraill o ladrata rhwng 28 Gorffennaf ac 14 Awst.

Mae Gavin Burnett a Darren Burnett wedi eu cyhuddo o un achos o gynllwynio i ladrata, ac un achos o gynllwynio i ddwyn cerbydau yn dilyn "sawl achos o ladrata mewn cartrefi yn Northampton, ac ar ôl i nifer o geir gael eu dwyn".

Mae Gavin Burnett hefyd wedi ei gyhuddo o ymddwyn mewn modd bygythiol, ac o fygwth lladd.

Heddlu ar y safle yr wythnos gynt

Yn y cyfamser mae wedi dod i'r amlwg bod yr heddlu wedi bod i'r amgueddfa yn Sain Ffagan i "helpu gydag archwiliadau diogelwch" yr wythnos cyn i'r eitemau gael eu dwyn.

Ond dywedodd Prif Weithredwr Amgueddfa Cymru, Jane Richardson wrth bwyllgor diwylliant Senedd Cymru nad oedd yr amgueddfa wedi gwneud toriadau i fesurau diogelwch dros y blynyddoedd diwethaf ond eu bod wedi yn "eu cynyddu oherwydd yr amgylchedd yr ydym yn gweithredu ynddo".

Ychwanegodd fod yr heddlu "gyda ni'n rheolaidd oherwydd eu bod yn gwybod ein bod yn darged proffil uchel." Gofynnwyd i Heddlu De Cymru wneud sylw.

Dywedodd Ms Richardson wrth y pwyllgor ddydd Mercher fod "y risg gynyddol i sefydliad fel ein un ni wedi bod yn sicr yn wir am 18 mis, os nad y ddwy flynedd rydw i wedi bod yn y swydd, felly fe wnaethon ni gynyddu mesurau diogelwch dros y ddwy flynedd ddiwethaf mewn gwirionedd".

"Rydym yn gweithio'n agos iawn, iawn gyda'r heddlu. Roedden nhw wedi bod ar y safle gyda ni yn Sain Ffagan yn ein helpu gydag archwiliadau diogelwch yn yr wythnos cyn yr ymosodiad hwn."

Dywedodd Jane Richardson bod yr amgueddfa eisoes wedi ystyried eu bod yn darged

Dywedodd na fydd yr amgueddfa'n "cymryd camau gweithredu ar unwaith o ganlyniad i'r digwyddiad penodol hwn, ond byddwn wrth gwrs yn edrych ar yr hyn y gallwn ei ddysgu ohono".

"Byddwn yn gweithredu ar sail unrhyw beth y gallwn ei ddysgu.

"Ond roedden ni eisoes ar yr hyn y gellir ei alw'n lefel rhybudd uchel."

Gan gyfeirio at doriadau "proffil uchel iawn" i gyllid yr amgueddfa, dywedodd "nad ydym wedi gwneud unrhyw doriadau o gwbl i unrhyw un o'n trefniadau diogelwch.

"Yn hollol groes i hynny, rydym wedi bod yn cynyddu'r rheiny oherwydd yr amgylchedd yr ydym yn gweithredu ynddo."

Pwysleisiodd cadeirydd yr amgueddfa, Kate Eden, yr angen i "wahaniaethu rhwng y pryderon yr ydym wedi bod yn eu codi, a'r pwyllgor wedi bod yn eu codi, ynghylch y cyllid ar gyfer yr adeiladwaith a'r hyn a ddigwyddodd nos Sul nad oedd yn ganlyniad i unrhyw un o'r materion yr ydym wedi bod yn eu codi ers nifer o flynyddoedd".

"Mae'r ddau fater ar wahân ac yn wahanol."