Covid-19: 737 achos newydd a 23 marwolaeth

Cafodd 737 achos a 23 marwolaeth yn gysylltiedig â coronafeirws eu cofnodi gan Iechyd Cyhoeddus Cymru ddydd Sadwrn.

Mae'n golygu bod 191,677 o achosion positif wedi'u cofnodi yng Nghymru ers dechrau'r pandemig.

Mae 4,720 o bobl bellach wedi marw gyda'r haint hefyd.

Yn y cyfamser, mae 378,200 o bobl yng Nghymru wedi derbyn un dos o'r brechlyn Covid-19.

Roedd ffigyrau diweddaraf Iechyd Cyhoeddus Cymru - a gyhoeddwyd amser cinio ddydd Sadwrn - hefyd yn dweud bod 750 o bobl wedi derbyn dau ddos.

Mae 69.1% o bobl dros 80 oed wedi derbyn eu dos cyntaf erbyn hyn.

Ddydd Gwener, dywedodd Prif Weinidog Cymru, Mark Drakeford bod y cynllun brechlynnau yn mynd o nerth i nerth.