Y Bencampwriaeth: Abertawe 2-0 Norwich
- Cyhoeddwyd
André Ayew sgoriodd gôl gynta'r gêm yn dilyn camgymeriad gan golwr Norwich, Tim Krul
Mae Abertawe wedi codi i'r safleoedd dyrchafu yn y Bencampwriaeth yn dilyn buddugoliaeth wych dros Norwich, sydd ar frig y tabl.
Aeth Yr Elyrch ar y blaen ar ddiwedd yr hanner cyntaf, gydag André Ayew yn manteisio wedi i golwr Norwich, Tim Krul fethu â chadw ei afael ar y bêl yn dilyn cic gornel.
Dyblwyd y fantais ar ddechrau'r ail hanner wrth i Conor Hourihane sgorio gydag ergyd wych o bellter - ei drydedd gôl mewn tair gêm i'r tîm cartref.
Fe allai Norwich fod wedi ymestyn eu mantais ar frig y tabl i saith pwynt gyda buddugoliaeth nos Wener.
Ond mae'r canlyniad yn golygu bod Abertawe yn codi i'r ail safle yn y tabl, ddau bwynt yn unig y tu ôl i Norwich, sydd wedi chwarae un gêm yn rhagor.