Ymchwiliad wedi i filwr gael ei ladd yng Nghastellmartin

Mae Castellmartin yn un o ddwsin o stadau hyfforddi'r fyddin yn y DU

Mae milwr wedi cael ei ladd yn ystod ymarferiad tanio byw ar faes ymarfer Castellmartin yn Sir Benfro.

Mae'r BBC wedi cael ar ddeall fod y milwr yn Sarjant gyda'r Gwarchodlu Cymreig.

Dyw'r Weinyddiaeth Amddiffyn ddim wedi cyhoeddi enw'r milwr, ond maen nhw wedi cadarnhau ei fod e wedi cael ei ladd mewn digwyddiad yng Nghastellmartin ddydd Iau.

Maen nhw'n dweud nad yw hi'n briodol i wneud sylw pellach am fod ymchwiliad ar y gweill, ond mae'r Weinyddiaeth Amddiffyn wedi dweud bod eu meddyliau gyda theulu a ffrindiau'r milwr gafodd ei ladd.

Mae ymchwiliad yn cael ei gynnal gan Heddlu Dyfed-Powys, yr Heddlu Milwrol Brenhinol a gan y gangen sydd yn ymchwilio i ddamweiniau ym maes amddiffyn.

Dyma'r pedwerydd aelod o'r lluoedd arfog i farw yng Nghastellmartin yn ystod y deng mlynedd diwethaf.

Cafodd dau aelod o Gatrawd Brenhinol y Tanciau - Matthew Hatfield a Darren Neilson eu lladd mewn ffrwydrad yn 2017.

Yn 2012, lladdwyd milwr o'r enw Michael Maguire yn ddamweiniol yn ystod ymarferiad tanio byw ar y maes ymarfer yn Ne Sir Benfro.