Ymgyrch i enwi mwy o lorïau graeanu Cymru

Mae 10 o lorïau graeanu Traffig Cymru wedi'u henwi yn barod

Mae'r cyhoedd yn cael eu hannog i helpu i enwi 30 o lorïau sy'n graeanu ffyrdd Cymru.

Daw'r apêl ddiweddaraf ar ôl i Snowain Glyndŵr, Fan Halen a Dai Icer fod ymhlith y ceisiadau buddugol mewn cystadleuaeth debyg y llynedd.

Lansiodd Traffig Cymru ei gystadleuaeth enwi gyhoeddus gyntaf ar gyfer y fflyd yn 2020 a dewiswyd 10 enillydd o blith mwy na 300 o gynigion.

Bydd y bleidlais newydd ar gyfer graeanwyr yn ne Cymru yn rhedeg o fis Medi 2021.

Dywedodd Traffig Cymru y byddai'n cyhoeddi ei ddewisiadau gorau o fis Hydref ymlaen.

Roedd Dai Icer ymhlith un o'r ceisiadau llwyddiannus i'r gystadleuaeth ddiwethaf

O'r 10 sydd wedi'u henwi hyd yma, mae rhai wedi'u henwi ar ôl unigolion Cymreig a chyfeiriadau diwylliannol, tra bod eraill wedi ymgymryd â themâu tymhorol:

• Oh Salt's Occurring

• Snowain Glyndŵr

• Pretty Gritty City

• Fan Halen

• Aneurin Bevan

• Pont Y Ploughie

• Y Ddraig Oren

• Dai Icer

• Eira Gwyn

• Cymro

Dewiswyd yr enw Aneurin Bevan - sylfaenydd y Gwasanaeth Iechyd Gwladol - i anrhydeddu'r GIG a'r staff gofal iechyd sydd wedi gweithio yn ystod pandemig Covid-19.

Dywedodd Traffig Cymru ei fod yn edrych ymlaen at dderbyn "mwy o syniadau rhagorol" eleni.

"Gall pobl anfon eu henwau ar thema Cymru trwy ddefnyddio #NameOurGrittersSW neu drwy e-bostio.

"Cymerwch ran a helpwch i roi mwy o gwmni i Oh Salt's Occurring, Snowain Glyndŵr a gweddill ein fflyd," ychwanegodd.