Canser y fron wedi 'dwyn bywyd' mam o Gymru
- Cyhoeddwyd

Cafodd Justine Jianikos ddiagnosis o ganser y fron bedwar diwrnod cyn y Nadolig
Dywed mam o Bont-y-Pŵl bod canser wedi "dwyn ei bywyd" ar ôl oedi wrth ganfod ei salwch - a bellach does dim modd ei gwella.
Mae Justine Jianikos bellach wedi dechrau ysgrifennu cardiau ar gyfer ei merched Josie, 9, Halle, 6, a Ruby, 5, ar gyfer y cerrig milltir y bydd hi'n eu colli - penblwyddi, priodasau, a hyd yn oed pasio eu profion gyrru.
"Er nad ydw i am fod yma ar eu cyfer, mae angen iddyn nhw gael rhywbeth i wybod fy mod i bob amser yn meddwl amdanyn nhw," meddai.
Dywedodd Bwrdd Iechyd Prifysgol Aneurin Bevan eu bod nhw'n ymchwilio i bryderon Ms Jianikos.
Aros am dri mis
Roedd Justine ond yn 29 oed pan sylwodd ar lwmp ger ei chesail fis Mai diwethaf.
Dywed wrthi i ddechrau mai fibroadenoma oedd, sef lwmp brasterog sy'n aml yn digwydd yn y fron.
Tyfodd y lwmp i oddeutu 5cm mewn diamedr ac erbyn mis Medi, roedd wedi mynd yn boenus felly fe aeth yn ôl at ei meddyg teulu.
"Y tro hwn fe gymerodd dri mis i mi gael fy ngweld yng nghlinig y fron", meddai.
"Ar ôl derbyn copi o fy nodiadau meddygol, fe wnaethon ni sylwi ar rhywbeth wedi'i nodi ddwywaith, mewn print bras, 'brys, amheuaeth o ganser'. Ond fe gymerodd dri mis."

Ym mis Rhagfyr, cafodd gynnig biopsi - rhywbeth sydd ddim fel arfer yn cael ei gynnig i ferched o dan 30 oed, meddai - a chafodd ddiagnosis o ganser y fron bedwar diwrnod cyn y Nadolig.
Daeth i'r amlwg bod ganddi fath prin a ffyrnig o'r salwch, a'i fod wedi lledaenu i'w hasgwrn cefn a'i hysgyfaint.
Dywedodd bod ei oncolegydd yn meddwl pe bai ei chanser wedi'i ddarganfod yn gynharach, y gallai pethau wedi bod yn wahanol.

Justine Jianikos yn cael torri ei gwallt gan ei merch Halle
"Dwi nawr yn edrych ar fywyd gwahanol iawn. Am weddill fy oes, dwi'n mynd i fod yn ymladd i ddal gafael ar fy mywyd. Mae hynny'n frawychus iawn."
"Dwi wedi dweud wrth fy hun, cyn belled â fy mod yn medru deffro a gwneud brecwast i fy ngenod bach, cyn belled â fy mod yn medru mynd â nhw i'r ysgol, a bod yn fam arferol iddyn nhw, dyna'r cyfan sydd angen iddyn nhw ei wybod."
Mae Justine yn dechrau ei phumed rownd o gemotherapi yr wythnos hon ac yna mae ganddi un arall i fynd.
"Mae pobl yn edrych ymlaen at y diwrnod pan mae nhw wedi dod i'r diwedd, ac y maent yn cael canu'r gloch.
"I mi, dyna fydd y diwrnod mwyaf dychrynllyd fy mywyd oherwydd dwi'n gwybod ar ôl hynny bydd dim rhagor o gyffuriau yn fy nghorff yn ceisio ymladd yn erbyn y canser nes bod fy nghynllun triniaeth nesaf yn cael ei lunio."

Mae Justine Jianikos wedi bod yn ysgrifennu cardiau ar gyfer cerrig milltir bywydau ei phlant
Mae triniaeth pellach ar y GIG yn dal yn aneglur, felly mae teulu a ffrindiau Justine yn y broses o godi £100,000 i geisio ariannu triniaethau amgen preifat a allai helpu i ymestyn ei bywyd, gan gynnwys y cyffur Trodelvy sydd ond wedi'i drwyddedu yn yr UDA.
"Ni alla i achub fy hun, ond mi fedrai achub rhywun arall drwy godi ymwybyddiaeth o ganser y fron negyddol triphlyg, neu ganser yn gyffredinol," meddai.
"Os oes unrhyw beth nad ydych chi'n siŵr amdano, ewch i gael golwg arno ac ymddiried yn eich greddf - rydych chi'n adnabod eich corff eich hun."
Bwrdd iechyd yn ymchwilio
Dywedodd llefarydd ar ran bwrdd iechyd Aneurin Bevan: "Mae'n ddrwg iawn gennym nad yw Ms Jianikos yn hapus gyda'r gofal y mae hi wedi'i dderbyn.
"Ar hyn o bryd, rydym yn ymchwilio i mewn i'w phryderon a byddwn yn ei hysbysu'n llawn am ddatblygiadau'r ymchwiliad.
Straeon perthnasol
- Cyhoeddwyd9 Mawrth 2020
- Cyhoeddwyd4 Chwefror 2020