Cân i Gymru 2022: Pwy sydd yn cystadlu eleni
- Cyhoeddwyd

Trystan ac Elin fydd yn arwain y gynulleidfa trwy Cân i Gymru eto eleni
Mae hi'r amser hynny o'r flwyddyn unwaith eto, mae Cân i Gymru yma.
Bydd Elin Fflur a Trystan Ellis-Morris yn ôl yn cyflwyno'r gystadleuaeth yn fyw o Ganolfan y Celfyddydau yn Aberystwyth, nos Wener 4 Mawrth.
Panel o arbenigwyr sydd wedi bod wrthi yn dewis pa wyth trac sydd am gael eu perfformio ar y noson. Ar y panel eleni roedd Dafydd Iwan, Lily Beau, Elidyr Glyn a Betsan Haf Evans.
Felly pwy yw cyfansoddwyr caneuon eleni a pwy fydd yn eu perfformio?
1. Rhyfedd o Fyd

Carys Owen ac Elfed Morgan Morris, cyfansoddwyr Rhyfedd o Fyd
Cyfansoddi: Elfed Morgan Morris a Carys Owen
Geiriau: Emlyn Gomer Roberts
Perfformio: Elain Llwyd

Emlyn Gomer sydd yn gyfrifol am eiriau Rhyfedd o Fyd
Dim dyma'r tro cyntaf i Elfed na Carys gyrraedd rownd derfynol Cân i Gymru. Cyfansoddodd Elfed gân fuddugol 2009 sef Gofidiau, a chafodd Carys ail gyda Rhy Gry yn 2002, gafodd ei chyfansoddi ar y cyd gydag Emyr Rhys. Emlyn Gomer, cyn aelod o'r band Gwerinos sydd yn gyfrifol am lunio geiriau Rhyfedd o Fyd.

Elain Llwyd fydd yn perfformio Rhyfedd o Fyd
2. Cana dy Gân

Cyfansoddi: Geth Tomos
Geiriau: Geth Robyns
Perfformio: Rhys Owain Edwards (Fleur De Lys)

Dau Geth sy'n ddau athro sy'n gyfrifol am y gân roc Cana dy Gân. Mae geiriau Geth Robyn yn annog pobl i sefyll i fyny dros yr hyn maen nhw'n gredu ynddo a gwarchod beth sydd o'u cwmpas. Rhys o'r band Fleur De Lys fydd yn perfformio.

Rhys o'r band Fleur De Lys fydd yn perfformio Cana dy Gân
3. Paid Newid dy Liw

Dyma'r ail dro i Mali gyrraedd yr wyth olaf, y tro yma mae hi wedi cyd-gyfansoddi gyda Trystan sy'n aelod o'i band hefyd
Cyfansoddi: Mali Hâf a Trystan Hughes
Perfformio: Mali Hâf
Un arall sydd wedi cael blas ar Cân i Gymru yn y gorffennol yw Mali Hâf. Cystadlodd yn 2019 dan yr enw Mali Melyn yn canu Aros Funud. Mae wedi cyfansoddi ar y cyd gyda Trystan Hughes o Gymoedd Abertawe yn wreiddiol ar drac sydd â natur a phrydferthwch y byd fel ei prif thema.
4. Ymhlith y Cewri

Darren Bolger, fydd yn perfformio ei gân ei hun
Cyfansoddi: Darren Bolger
Perfformio: Darren Bolger
2015 oedd y tro diwethaf i Darren Bolger gyrraedd wyth olaf Cân i Gymru gyda'i drac O'r Brwnt a'r Baw, gyda Cy Jones yn perfformio. Eleni bydd yn perfformio ei drac ei hun, Ymhlith y Cewri, sy'n pwysleisio rôl y genhedlaeth hŷn mewn arwain y ffordd mewn byd o ddatblygiadau a newid technolegol.
5. Diolch am y Tân

Carys Eleri a Branwen Munn
Cyfansoddi: Carys Eleri a Branwen Munn
Perfformio: FFLOW
Collodd Carys - actores, cyflwynydd ac awdur - ei thad o'r cyflwr motor niwron yn 2017. Cyfansoddwyd Diolch am y Tân ar y dydd y byddai ef wedi troi yn 70, fel dathliad o'i fywyd. FFLOW, sef band newydd Carys a Branwen fydd yn perfformio ar y noson. Mae'r ddwy wedi cyd-weithio ar sioe un fenyw Carys, Lovecraft (Not the Sex Shop in Cardiff) a'i sengl, Don't Tell the Bees.
6. Pan Ddaw'r Byd i Ben

Steve Williams sydd wedi cyrraedd yr wyth olaf am yr ail flwyddyn yn olynol
Cyfansoddi: Steve Williams
Perfformio: Steve Williams
Wyneb cyfarwydd i gynulleidfa Cân i Gymru 2021. Cyrhaeddodd yr wyth olaf llynedd gyda'i gân Yr Arlywydd. Eleni mae'r ditectif i Heddlu Dyfed Powys wedi cael ei ysbrydoli i gyfansoddi gan ddigwyddiadau COP-26 a newid hinsawdd.
7. Mae yna Le

Rhydian Meilir
Cyfansoddi: Rhydian Meilir
Perfformio: Ryland Teifi
Mae Rhydian, o Gemaes ger Machynlleth, yn wyneb cyfarwydd iawn i Cân i Gymru. Mae wedi cyrraedd y rhestr fer yn 2012 gyda Cynnal y Fflam, yn 2019 gyda Gewn ni Weld Sut Eith Hi a llwyddodd gyfansoddi dwy gân ar restr fer 2020, sef Pan Fyddai'n 80 Oed a Tir a'r Môr. Ryland Teifi fydd yn perfformio'r gân, sy'n deyrnged i natur a phrydferthwch y byd.

Ryland Teifi fydd yn perfformio Mae yna Le
8. Rhiannon

Siôn Rickard
Cyfansoddi: Siôn Rickard
Perfformio: Siôn Rickard
Mi fydd Siôn yn perfformio hon yn arbennig i'w gariad, Rhiannon. Mae'n wreiddiol o Fetws y Coed, ond yn byw yng Nghaerdydd. Mae'n un hanner o'r band gwerinol Lo-fi Jones, yr hanner arall yw ei frawd Liam.
Hefyd o ddiddordeb: