Braw yn dilyn tân mewn adeilad yng nghanol Caerdydd

Mae dyn wedi disgrifio'r braw o orfod ceisio gadael adeilad aeth ar dân brynhawn Gwener yng nghanol dinas Caerdydd.

Cafodd nifer o griwiau tân eu danfon mewn ymateb i alwadau brys tua 12:30 yn dweud bod yna dân mewn "adeilad pedwar llawr aml-ddefnydd" ar Heol Eglwys Fair.

Roedd yna gyngor am gyfnod i bobl osgoi ardal Heol Caroline a gwaelod Heol Eglwys Fair, ac roedd mwg du, trwchus i'w weld yn codi o adeilad yno.

Yn ôl Gwasanaeth Tân ac Achub De Cymru, roedd y tân "yn lledu o'r llawr gwaelod i ardal y to".

Mwg trwchus i'w weld yn dod o adeilad yn Heol Caroline

Dywedodd llefarydd ar ran Gwasanaeth Tân ac Achub De Cymru bod criwiau'r gwasanaethau brys ac asiantaethau eraill wedi sefydlu cordon a threfnu i wagio'r adeilad dan sylw.

Cafodd offer arbenigol ei ddefnyddio, gan gynnwys platfform ysgol awyr, i ddiffodd y fflamau ac roedd y tân dan reolaeth erbyn14:20.

'Ddim yn medru dod o hyd i ffordd allan'

Mae Ahmed Hasnawi yn byw mewn fflat ar y stryd gyda'i wraig a'i ferch tair oed, Dima. Fe glywodd larwm tân cyn ceisio gadael yr adeilad.

"Roedd y mwg yn drwchus a doeddwn ni ddim yn medru dod o hyd i'r ffordd allan," meddai.

"Doedd na ddim arwydd ac mi redais ac mi welais un o'm cymdogion oedd hefyd yn chwilio am ffordd allan.

Roedd gorfod gadael yr adeilad wedi iddo fynd ar dân yn frawychus i Ahmed Hasnawi a'i deulu

"Mi wnes i feddwl am adael drwy'r ffenest a cherdded ar y gwydr [rhwng yr adeilad a'r bwyty drws nesa]. Mi wnes i agor y ffenest a dwi'n meddwl i mi ei thorri.

"Roedden ni wedi dychryn a doeddwn ni ddim yn gwybod beth i wneud.

"Tra mod i yn chwilio am ffordd allan roedd fy ngwraig yn chwilio am foddion ein merch - mae ganddi gyflwr meddygol.

"Roedd y mwg yn drwchus iawn a doeddwn i ddim yn medru mynd drwodd. Mae'n arogli'n gryf.

"'Dan ni yn ddiogel nawr ond dy'n ni ddim yn gwybod beth i wneud."

Fe welodd un o gymdogion Mr Hasnawi fod tân yn ei bloc o fflatiau ar ôl gweld llun ar-lein tra'n gweithio mewn canolfan siopa gyfagos.

Dywedodd Mai, nad oedd am roi ei chyfenw: "Mi welais i'r llun a deud 'fan'na dwi'n byw'.

"Dwi'n poeni os oes 'na damage ond be fedri di neud? Fedra' i'm neud dim byd amdano."